Bjart­sýn á að til verði stjórn sem þori að taka á­kvarðanir

Formenn Samfylkingarinnar, Viðreisnar og Flokks fólksins og vinnuhópar á þeirra vegum héldu stjórnarmyndunarviðræðum áfram í dag og er bjartsýnar á framhaldið.

„Við erum allar að vinna undir og með það að markmiði að klára þetta. Við höfum sett mikla vinnu í þetta. Erum að skella fram stífum afkomuramma vegna þess að við erum meðvitaðar um stöðu efnahagsmála,“ sagði Kristrún Frostadóttir síðdegis í dag.

Fjármálaráðuneytið birti í dag endurmat á afkomuhorfum ríkissjóðs og samkvæmt því eru horfurnar mun verri en áætlað var. Samkvæmt fyrri áætlunu ríkisstjórnarinnar til 2029 átti að ná hallalausum fjárlögum árið 2028 eins og sést á raunðu brotalínunni á myndinni hér fyrir neðan. En á bláu línunni sést að hallalaus fjárlög eru ekki í augnsýn í náinni framtíð samkæmt nýjustu afkomuhorfum, sem Kristrún segir hafa verið ræddar í dag.

Þannig að þið eruð komnar með ramman utan um þessi stóru mál sem þú varst að nefna?

„Það má segja að við séum einmitt að reyna að finna hvar svigrúmið er. Hvar við erum alveg sammála, hvar þarf að liðka til. Það mun alltaf einhver þurfa að gefa eftir einhvers staðar. Það liggur alveg fyrir í þriggja flokka samstarfi að það verða einhverjar málamiðlanir."

Það liggi fyrir að fráfarandi ríkisstjórn skili verra búi en hún hafi áður haldið fram. Það væru hægari umsvif í hagkerfinu meðal annars vegna þess að gríðarlega háir vextir hafi haldið niðri fjárfestingum og umsvifum í efnahagsmálum.

„Og þetta þýðir að við þurfum að passa okkur betur, hvernig við högum stöðu ríkisfjármála og vali aðgerða. En við tökum þessu mjög alvarlega. Erum alveg tilbúnar í þetta verkefni og ég held að það megi horfa á það með ákveðnum bjartsýnisaugum að mögulega sé nýtt fólk að fara að taka við,  sem er tilbúið að taka ákvarðanir sem fyrri ríkisstjórn treysti sér ekki í," segir Kristrún.

Þetta þýði að málið verði snúnara og horfa þurfi bæði til tekjuhliðar og hagræðingar í ríkisfjármálum.

„Um þetta erum við að ræða akkúrat núna. Það munu sum verkefni þurfa að bíða. En við vitum að ef ekkert er að gert verða heimilin og fyrirtækin í verri stöðu. Þannig að við vitum að forgangsröðin þarf að vera á að lækka vexti og verðbólgu," segir formaður Samfylkingarinnar.

Í viðræðunum hefur verið stefnt að því að fækka ráðuneytunum. Kristrún segir ekki þó ekki stefnt að stórkostlegri uppstokkun á stjórnsýslunni.

„Enda væri það óskynsamlegt. Við viljum ekki skapa einhvern óþarfa usla. Við erum fyrst og fremst að horfa á með hvaða hætti við getum straumlínulagað stjórnsýsluna enn þá betur. Hvernig við getum sett verkefni á eðlilegan stað ef svo má segja.“ Það sama gildi þegar komi að skiptingu og fjölda ráðuneyta á milli flokkanna.

„Það skiptir máli hver er í hvaða stöðu. Ekki bara hvaða flokkur er með hvaða stöðu. Við viljum líka að það sé traust og ákveðin samstaða og samvinna í þessari ríkisstjórn. Þannig að það eru alls konar sjónarmið sem koma að," sagði Kristrún Frostadóttir þegar hún var spurð um mögulega skiptinguráðuneyta milli flokkanna.