107 ára gömul og dansar eins og ung­lamb

Það þykir ekki tiltökumál ef fólk nær því að vera 100 ára í dag en um 900 Íslendingar hafa náð þeim aldri en aðeins fimmtán hafa náð því að verða 107 ára og er Þórhildur sextándi Íslendingurinn sem nær þeim áfanga. Hún er alltaf kát og hress en hún býr á Sléttuveginum í Reykjavík í þjónustuíbúð hjá Hrafnistu.

Þórhildur er fædd 22. desember 1917 í Biskupstungum í Miðhúsum en fjölskyldan flutti fljótlega þaðan að Vatnsholti í Grímsnesi og bjó þar í um tvö ár áður en þau fluttu til Reykjavíkur 1923 þar sem Þórhildur hefur búið síðan. Eiginmaður Þórhildar var Gústaf Adólf Lárusson húsasmíðameistara frá Efri – Vaðli á Barðaströnd en hann dó 2013. Þórhildur og Gústaf eignuðust sex dætur en fimm þeirra eru á lífi á aldrinum 74 til 82 ára.

En hvernig er að verða orðin 107 ára?

„Það er bara gott þegar heilsan er í lagi og þá er allt fínt, bara ljómandi gott,“ segir Þórhildur.

Hverju þakkar þú fyrir hvað þú ert hraust og hress?

„Að fara þokkalega með sig og hafa nóg að gera,“ segir hún brosandi.

Þórhildur hefur alltaf haft gaman af því að dansa og hún var fljót að bjóða fréttamanni upp í dans í dag. Henni hlakkar til jólanna en þar sé númer eitt, tvö og þrjú að fjölskyldan komi saman. Jólagjafirnar skipti engu máli þegar maður er orðinn 107 ára.

„Já, leggja meira upp úr því að koma saman og eiga góða samveru.“

En hvað stefnir Þórhildur á að verða gömul?

„110 ára, þannig að ég er að seilast í áttina,“ segir hún hlæjandi.

Og þessum skilaboðum vildi Þórhildur koma á framfæri til landsmanna á 107 ára afmælisdeginum.

„Vera trúr sjálfum sér og vita hvað er rétt og hvað er rangt, það er bara svoleiðis.“

Og hvað haldið þið, jólasveinn mætti óvænt í afmælið og söng að sjálfsögðu afmælissönginn með Þórhildi og gestum hennar.