Næstum allir nýir bílar í Noregi rafmagnsbílar

Í heildina var 128.691 nýr bíll keyptur í Noregi í fyrra og samsvarar það aukningu um 1,4 prósent samanborið við 2023. Af þessum bílum ganga 114.400 eingöngu fyrir rafmagni. Það samsvarar 89 prósentum en árið 2023 var hlutfallið 82,4 prósent, samkvæmt gögnum frá OFV, sem heldur meðal annars utan um tölfræði varðandi bíla í Noregi.

Á vef OFV segir að bílasala í Noregi hafi þótt lítil árið 2023 og svipað sé upp á teningnum 2024. Sala hafi þau aukist töluvert seinni hluta ársins. Margir hafi keypt smærri og ódýrari bíla vegna hárra vaxta í Noregi og mögulegt sé að sala verði enn í minni kantinum 2025.

Þó 128.691 bíll hafi verið keyptur nýr skiptu rúmlega hálf milljón bíla um eigendur í Noregi í fyrra. Það samsvarar fækkun um 1,4 prósent milli ára og þykir það til marks um að Norðmenn vilji eiga bíla sína lengur.

Teslur vinsælastar

Af þeim sem keyptu sér nýja bíla í Noregi á árinu keyptu flestir Teslu en 13,1 prósent keyptu sér Model Y og 5,6 prósent keyptu sér Model 3. Þá keyptu einnig 5,6 prósent þeirra sem keyptu nýja bíla Volvo EX30 og einnig Volkswagen ID.4.

Kínverskir framleiðendur rafmagnsbíla eru samanlagt með rétt rúmlega tíu prósent seldra bíla í fyrra.

Í samtali við Reuters segir Christina Bu, formaður sambands norskra rafmagnsbílaeigenda, að Norðmenn verði fyrstir í heiminum til að selja eingöngu nýja rafmagnsbíla. Það er markmið sem Norðmenn hafa ætlað sér að ná á þessu ári.

Þó Norðmenn framleiði mikið ef olíu og jarðgasi eru háar álögur settar á nýja bíla sem ganga fyrir þeim aflgjöfum. Þá hefur umfangsmiklum ívilnunum verið beitt til að ýta undir kaup á rafmagnsbílum.

Leiðtogar Evrópusambandsins hafa ákveðið að banna sölu bíla sem gefa frá sér koltvísýring fyrir árið 2035.

Sjá einnig: „Mun enginn kaupa annað en rafbíl árið 2028“

Hér á landi tók sala rafmagnsbíla dýfu eftir að ívilnanir voru afnumdar áramótin 2023-24. En stefnt er að því að gera nýskráningar bensín- og dísilbíla óheimilar eftir árið 2030.