Glódís bjargaði marki og á­fram heldur sigur­ganga Bayern

Dominika Grabowska kom Hoffenheim yfir á 25. mínútu. Klara Buhl jafnaði hins vegar aðeins níu mínútum síðar. Alara Sehitler kom Bayern svo yfir í seinni hálfleik. 

Hoffenheim var næstum því búið að jafna leikinn í 2-2 á 80. mínútu en Glódís átti góða björgun og sá til þess að það gerðist ekki. 

Pernille Harder innsiglaði svo sigurinn með þriðja marki Bayern á lokamínútu venjulegs leiktíma.

Bayern byrjaði tímabilið á fimm sigrum í röð, síðan tók við tap, sigur og tvö jafntefli en nú hefur liðið aftur unnið fimm deildarleiki í röð og endurheimt efsta sæti deildarinnar.

Það gæti hins vegar breyst á morgun þegar Frankfurt mætir botnliði Potsdam. Með sigri myndi Frankfurt jafna Bayern að stigum og taka toppsætið á betri markatölu.