Mið­flokkurinn gagn­rýnir að Daði Már flytji tölu

Samkvæmt dagskrá þingsins flytur Kristrún forsætisráðherra stefnuræðu sína í kvöld. Það mun hún gera klukkan 19:40. Umræðurnar skiptast í tvær umferðir, forsætisráðherra hefur 12 mínútur í framsögu en aðrir þingflokkar hafa sex mínútur í fyrri umferð. Í seinni umferð hafa allir ræðumenn sex mínútur.

Á vef Alþingis er að finna lista yfir þá „þingmenn“ sem munu flytja ræðu eftir að Kristrún hefur lokið máli sínu.

Miðflokkurinn í Mosfellsbæ gerir athugasemd við þetta.

„Glöggur kjósandi hefur beint því til okkar að leita uppi þá er vita til þess að núverandi fjármála- og efnahagsráðherra hafi ritað undir drengskaparheitinn á Alþingi Íslendinga,“ segir á Facebook-síðu flokksins.

„Er Daði Már Kristófersson þingmaður? Við skulum vona að efni stefnuræðunnar sé vandaðari en þessi útlegging á dagskrá þingsins fyrir kvöldið.“

Af þessu má ráða að stjórnarandstaðan verður vakandi yfir hverju skrefi ríkisstjórnarinnar.