„Við vitum að þessu er stjórnað af Ás­laugu Örnu“

Í gær var aðalfundur Félags sjálfstæðismanna í Smáíbúða-, Bústaða- og Fossvogshverfi þar sem sætum á landsfund flokksins var úthlutað. Erlendur Borgþórsson, fyrrverandi formaður félagsins sem hefur verið virkur í flokknum í áratugi, fékk ekki sæti á lista félagsins fyrir landsfund og segir ljóst að fylking Áslaugar Örnu sé að smala á fundi hverfisfélaga.

Gegn öllum hefðum

„Þetta er náttúrulega gegn öllum hefðum í flokknum. Þeir sem eru valdir á landsfund eru þeir sem starfa mikið innan flokksins og sinnt sjálfboðaliðastarfi í áraraðir og áratugi. Þeir hafa yfirleitt bara verið sjálfkjörnir af stjórninni á landsfund,“ sagði Erlendur.

Að hans sögn hafi starfandi stjórn félagsins yfirleitt raðað fólki á lista og borið það svo upp á hvefisfundi viðkomandi aðildarfélags.

„Þetta er nú alltaf unnið í friðsemd en þarna var verið að gera hallarbyltingu í félaginu. Við vorum búin að frétta það og þetta er ekki eina félagið. Þetta var reynt í Árbæ fyrir áramót, Neshverfi og Holtahverfi í vetur. Þannig það er ófriðarástandi hjá hverfafélögum innan Sjálfstæðisflokksins,“ sagði Erlendur.

„Við vitum að þessu er stjórnað af Áslaugu Örnu. Að manneskja skuli reyna að verða formaður flokksins byrji á að kynda ófriðarbál, það er alveg ótrúlegt að horfa upp á.“

Þeir sem voru valdir deila væntanlega ekki skoðun þinni?

„Þarna var listi settur fram, 23 aðilar sem félagið hefur af landsfundarfulltrúum. Stærstan hluta þessa fólks hef ég aldrei séð áður, hvorki nöfnin né fólkið. Ég er ekki einu sinni viss hvort það sé í flokknum og hefur aldrei unnið í flokknum,“ sagði Erlendur.

Þú getur fullyrt það?

„Ég get það, ég er búinn að vera vinna fyrir flokkinn í áraraðir. Maður þekkir fólkið sem hefur verið duglegt að vinna fyrir flokkinn. Fólkið þarna var það ekki, að langmestu leyti,“ sagði hann.

Það hefur væntanlega verið hiti á fundinum?

„Fólk brást misjafnlega við en þetta er ekki til að mynda samheldni meðal flokksfélaga. Þetta er ófriðarbál. Maður er hissa á þessu, undrandi,“ sagði Erlendur.

Þú segir að það sé fólk þarna á vegum Áslaugar en þú ert væntanlega Guðrúnarmegin í þessu eða hvað?

„Ég er algjörlega óháður, ekki háður neinum og ekki búinn að mynda mér skoðun. Það er hægt að bjóða sig fram til formanns á landsfundinum sjálfum, þú veist ekkert hver á eftir að bjóða sig fram. Ég er ekki í hóp hjá einum eða neinum, ég vil bara góðan og gildan Sjálfstæðismann sem formann, mann sem bindur flokkinn saman og er friðarpostuli innan hans,“ sagði hann.

Venjulega friðsemdarfundir

Erlendur segir smölun byrjaða og þekkta stuðningsmenn hafa mætt á fundinn. Bæði Friðjón Friðjónsson og Óttar Guðjónsson hefðu mætt og látið mikið í sér heyra. Friðjón tilheyrir stuðningsmannahópi Áslaugar Örnu eins og fleiri sem fjölmenntu á framboðskynningarfund hennar.

„Þarna voru fleiri sem voru með ósteyt á fundinum. Venjulega eru þetta friðsemdarfundir þar sem fólk fær sér kaffi og klárar fundastörf. Þetta er mjög óvenjulegt en þetta hefur verið að færast í vöxt af einum frambjóðanda til formanns,“ sagði hann.

„Þarna er verið að nota aðferðir sem eru ekki til að binda fólk saman, bara til að skapa óeiningu og óánægju. Þetta er allt saman sjálfboðavinna, öll þessi vinna og fólk dregur sig bara í hlé og hættir. Það er ekkert að standa í svona leiðindum í sjálfboðavinnu,“ sagði Erlendur

Mætir á fund eftir fund

Fréttastofa hafði samband við Friðjón til að bera undir hann ásakanir um uppsteyt og smölun. Hann var á fundinum en kannast ekki við yfirlýsingar um uppsteyt.

„Ég var gestur á fundinum og sagði ekki orð vegna þess að ég var hvorki með atkvæðarétt eða málfrelsi. Þannig ég hélt mig til hliðar og sagði ekki orð allan fundinn,“ segir Friðjón.

Hvað kom til að þú mættir á þennan fund?

„Ég er borgarfulltrúi og reyni að mæta á alla aðalfundi allra félaga sem ég kemst á,“ sagði Friðjón sem var einmitt mættur á einn slíkan í Valhöll hjá Félagi sjálfstæðismanna í Laugarnes- og Túnahverfi.

„Hér eins og þar segi ég ekki neitt, ég talaði á aðalfundi félags Nes- og Mela en þar bý ég líka og er félagi í því félagi,“ sagði hann.

Viltu eitthvað svara fyrir þessar meintu smalanir?

„Ég veit ekki hvort ég vilji blanda mér í þetta hafandi verið gestur á fundinum. Ég veit ekki hvort það sé einhverjum til hagsbóta að önnur fylkingin í Reykjavík sé að styðja annan frambjóðandann og hin fylkingin sé að styðja hinn. Var ekki verið að tala um einhverja samheldni?“ sagði Friðjón.

„Listakosningin var afgreidd með handréttingu. Margir sem voru á lista stjórnarinnar voru þeir sömu og voru á listanum sem var samþykktur,“ segir hann.

Stjórnin lagði fram einn lista en meirihluta fundarmann studdi annan lista. Ekki tókst hins vegar að klára stjórnar- og formannskjör og verður kosið um það á framhaldsaðalfundi.

„Það var alveg borin virðing fyrir núverandi stjórnarmönnum, fólki sem var og hefur verið virkt í félaginu. Þetta er bara nákvæmlega eins og hefur verið lengi vegna þess að við erum með þetta fyrirkomulag,“ sagði Friðjón.