Sendi kærustuna með fiðluna svo hann kæmist í flugið

„Frá því að ég byrjaði að ferðast um Keflavíkurflugvöll hef ég aldrei lent í öðru eins. Þau gátu ekki einu sinni selt mér auka sæti þegar þetta kom í ljós þrátt fyrir að vélin væri langt frá því að vera full. Þau báru fyrir sig öryggi farþega er þau höfnuðu því að fiðla gæti farið í handfarangursrýmið fyrir ofan sætið,“ segir Pétur í færslu um málið á Facebook.

Þar skrifa aðrir fiðluleikarar að þeir hafi lent í því sama í flugi með Play en ekki með Icelandair. Við skoðun á heimasíðum beggja fyrirtækja má þó sjá að reglur þeirra eru sambærilegar. Á vef Play kemur fram að fólk geti ferðast með lítil hljóðfæri í handfarangri ef stærð þeirra er innan stærðartakmarka. Ef þau eru stærri segir að fólk geti keypt sér sæti og sleppir við að borga flugvallarskatta. Sams konar reglur eru hjá Icelandair. Auk þess er hjá báðum flugfélögum hægt að greiða fyrir innritaðan farangur.

Aldrei verið vandamál

„Ég kem út á völl og ég er í röðinni og hafði fyrir mistök ekki keypt handfarangurstöku sem ég geri alltaf til að vera öruggur með fiðluna. Þegar ég ætla að kaupa handfarangurstösku þá segir starfsfólkið að öryggisins vegna megi ekki hafa fiðlur og svona hljóðfæri í handfarangurshólfinu fyrir ofan farþega,“ segir Pétur og að honum hafi verið tilkynnt að hann yrði að kaupa aukasæti fyrir fiðluna ætlaði hann að ferðast með hana.

Þegar hann vildi gera það var það ekki möguleiki.

„Það var ekki hægt og mér var ekki boðin nein lausn minna mála. Það var allt ómöguleiki. Ég held ég hafi einu sinni farið í flug án fiðlunnar og þetta hefur aldrei verið vandamál,“ segir Pétur.

Hann segir að blessunarlega hafi kærastan hans, Elena, verið á Keflavíkurflugvelli á leið til Berlínar með Icelandair og þau hafi getað skipst á handfarangri.

„Ég hleyp þá úr röðinni til hennar og skipti við hana. Hún fékk fiðluna og ég tók bakpokann hennar í staðinn og komst þá í gegn. Þetta var smá action en var ekkert vesen. En það sem gerði þetta svo merkilegt var að vélin var nánast tóm. Það voru laus sæti og nóg laust í farangursrými.“

Hann segir ekki í boði að setja hljóðfæri eins og fiðlu niður í lest. Hljóðfærin séu viðkvæm fyrir kulda, til dæmis.

„Þetta eru dýr atvinnuhljóðfæri. Þau eru tryggð en í svona aðstæðum eru þau ekki tryggð og því ekkert annað í boði en að taka þau í farþegarúmið.“

Pétur segir þetta setja hljóðfæraleikara í erfiða stöðu. Þau ferðist mikið með hljóðfærin vegna náms eða vinnu og sé þetta staðan sé þeim einn kostur gefinn, og það er að ferðast með Icelandair eða öðrum flugfélögum. Sem dæmi hafi mörg erlend flugfélög sett það sem undantekningu við reglur um handfarangur að gítar, fiðla eða víóla megi flokkast sem handfarangurs-item fólks. Það er hvorki þannig hjá Play eða Icelandair en á vefsíðu til dæmis Delta má sjá fjallað um slíka undanþágu.

Pétur á ekki von á því að fljúga aftur með Play á meðan reglurnar eru svona.

Reglurnar skýrar

Guðbergur Ólafsson, forstöðumaður flugþjónustu hjá Play, segir upplýsingar um farangursreglur PLAY mega finna á vef félagsins. Þær komi einnig skýrt fram í bókunarferlinu.

„Við hjá PLAY höfum mikinn metnað fyrir því að þjónustuaðilar okkar á öllum okkar áfangastöðum framfylgi reglum félagsins og upplifun okkar farþega sé eins óháð því hvaða flugvöll farið er um. Hvort viðkomandi aðila hafi áður tekist að ferðast með fiðluna í handfarangri án þess að þurfa að greiða fyrir get ég ekki sagt til um en reglurnar eru skýrar og upplýsingar um farangursheimildir aðgengilegar fyrir okkar farþega eins og fyrr segir,“ segir Guðbergur í svari til fréttastofu.