Traustið var löngu farið úr sambandinu

Svava Marín Óskarsdóttir skrifar 19. febrúar 2025 11:03

Unnur og Jói Fel voru saman í um tuttugu ár og eignuðust tvö börn saman. Skjáskot

Unnur Helga Gunnarsdóttir, fyrrverandi framkvæmdarstjóri Bakarísins Jóa Fel og fyrrverandi eiginkona veitingamannsins Jóa Fel, segir traustið hafa verið löngu farið úr sambandi þeirra fyrir skilnað. Hún þakkar hugvíkkandi efnum hvernig gekk að vinna úr skilnaðinum.

Unnur Helga er gestur Sigurlaugar M. Jónasdóttur í nýjasta þætti af Segðu mér á Rás 1 og er samtal þeirra á persónulegu nótunum.

„Það var náttúrulega langur aðdragandi að skilnaðinum okkar Jóa,“ segir Unnur en þau hjóni voru gift í tuttugu ár og störfuðu saman í bakarínu sem kennt var við Jóhannes.

„Traustið var auðvitað löngu farið. En ég meina, þetta voru bara yndisleg ár og ég er mjög þakklát fyrir það allt. Svo tók við mjög erfiður tími. Skilnaðurinn var mér mjög þungbær. Það að stíga samtímis út úr hjónabandi sínu og einnig út úr fyrirtækinu sínu, sem hafði verið ástríða manns og lifibrauð í þetta langan tíma, var bara mjög stórt.“

Kynntust í bakaríinu

Jói og Unnur sögðu í helgarviðtali á DV árið 2004 frá því hvernig ástin hefði kviknað. Unnur var nýskilin, Jói hafði nýopnað bakarí og þangað mætti Unnur til að kaupa brauð. Nokkrum vikum síðar voru þau orðin par. Saman eignuðust þau tvö börn.

Bakaríið var í rekstri í um tvo áratugi áður en það varð gjaldþrota í nóvember árið 2020.

Unnur hafði stigið frá borði þremur árum fyrr og viðurkennir að skilnaðurinn hafi reynst erfiður. Á þeim tíma réðst hún í meiriháttar framkvæmdir við húsbyggingu sem fjallað var um í Heimsókn á Stöð 2.

Segir efnin ekki fyrir alla

Hún segist þó alltaf hafa átt eftir að gera upp skilnaðinn. Góður vinur hennar hafi kynnt hana fyrir hugvíkkandi efnum.

„Það er nauðsynlegt að hitta einhvern sem kann til verka og veit um hvað þetta snýst, bæði áður, á meðan og ekki síst eftir. Þessi efni eru ekki fyrir alla. Það þarf að fara gætilega að þeim og umgangast þau af virðingu,“ segir Unnur.

Myrkrið hafi yfirgefið hana og ljósið komið inn í hana.

Ástin og lífið Tímamót Hugvíkkandi efni