Körfubolti

Elvar og Martin: Hvernig þetta byrjaði, hvernig þetta gengur

Ingvi Þór Sæmundsson skrifar
Elvar Már Friðriksson og Martin Hermannsson hafa lengi fylgst að.
Elvar Már Friðriksson og Martin Hermannsson hafa lengi fylgst að.

Jafnaldrarnir og vinirnir Elvar Már Friðriksson og Martin Hermannsson áttu stóran þátt í að Ísland tryggði sér sæti á EM í körfubolta með sigri á Tyrklandi í Laugardalshöll í gær. Eftir leikinn birti umboðsmaður þeirra félaga skemmtilega gamla mynd af þeim sem sýnir hversu lengi þeir hafa fylgst að.

Íslendingar unnu Tyrki með tólf stigum, 83-71, í lokaleik sínum í undankeppni EM 2025 í gær. Með sigrinum komst Ísland í þriðja sinn í lokakeppni Evrópumótsins.

Martin var stigahæstur í íslenska liðinu í leiknum í gær með 23 stig. Hann tók einnig þrjú fráköst og gaf fjórar stoðsendingar. Elvar skoraði þrettán stig, tók fjögur fráköst og gaf fimm stoðsendingar.

Elvar og Martin eru jafnaldrar, fæddir 1994, og hafa verið miklir vinir nánast frá því þeir voru í vöggu. Feður þeirra, Friðrik Ragnarsson og Hermann Hauksson, léku saman með landsliðinu og Njarðvík á sínum tíma.

Christos Lazarou er umboðsmaður þeirra Elvars og Martins og eftir leikinn birti hann skemmtilegar myndir af vinunum undir yfirskriftinni: Hvernig þetta byrjaði, hvernig þetta gengur.

Á fyrri myndinni eru Elvar og Martin barnungir en sú seinni er frá leiknum í Höllinni í gær og sýnir þá fagna EM-sætinu.

Martin er á leið á sitt þriðja Evrópumót en hann var með 2015 og 2017. Elvar lék á EM 2017.

Dregið verður í riðla fyrir EM 2025 þann 27. mars næstkomandi.

EM 2025 í körfubolta Landslið karla í körfubolta

Mest lesið


Fleiri fréttir

Sjá meira


×

Mest lesið