Skoðaði stað­setningu stúlkunnar hátt í 150 sinnum fyrir á­rásina

Fyrirtaka var í héraðsdómi í gær í máli piltsins sem sem er ákærður fyrir manndráp og tilraun til manndráps eftir hnífstunguárás á Menningarnótt í fyrra. Hin sautján ára Bryndís Klara Birgisdóttir lést af sárum sínum, en önnur stúlka og piltur særðust einnig.

Líkt og greint var frá í Kompás fylgdist árásarmaðurinn, sem er fyrrverandi kærasti stúlkunnar sem lifði af, með ferðum hennar í gegnum staðsetningarforritið Live360 kvöldið örlagaríka. Samkvæmt heimildum fréttastofu hafði pilturinn skoðað staðsetningu stúlkunnar 148 sinnum daginn sem árásin var framin. Samkvæmt farsímagögnum var Skúlagata 4 síðasta staðsetning stúlkunnar sem skoðuð var úr síma piltsins fyrir árásina.

Sjá einnig: For­eldrar Bryn­dísar Klöru í Kompás

Samkvæmt heimildum fréttastofu kom fram í skýrslutöku yfir stúlkunni að þau hafi deilt staðsetningu sinni með hvort öðru í appinu á meðan þau voru í sambandi. Enn hafi verið opið fyrir aðgang að upplýsingunum eftir að sambandinu lauk.

Foreldrar þurfi einnig að þekkja hætturnar

Í fréttum Stöðvar 2 í gær kom fram að afar almennt er meðal ungmenna að nýta sambærileg forrit til að deila staðsetningu sinni með öðrum og þykir jafnvel ekkert tiltöku mál. Það geti verið þægilegt að vita hvar vinirnir eru og jafnvel veitt ákveðið öryggi þegar staðsetningu er deilt með vinum og fjölskyldu sem viðkomandi treystir. 

Helga Þórisdóttir, forstjóri persónuverndar segir erindi sem tengjast slíkum forritum ekki hafa borist til stofnunarinnar. Þróunin sé hins vegar áhyggjuefni.

„Við viljum náttúrlega öryggi barna sem mest. Þarna held ég að sé aðallega kannski hættan að börn séu ekki að láta of stóran hóp til dæmis vita hvar þau ætli að vera. Vegna þess að það gefur náttúrlega augaleið að það getur boðið hættunni heim að einhver, fyrir utan foreldra og forráðamenn, viti hvar barnið er,“ segir Helga.

Foreldrar nýta tæknina einmitt einnig í auknum mæli til að fylgjast með börnum sínum í öryggisskyni. Það segir Helga ekki hættulaust heldur.

„Þú ert búinn að búa til einhverja rás í rauninni þannig að þú getir fylgst með barninu þínu. En þá er þarna komin rás fyrir kannski kunnáttufólk að komast inn í þau samskipti. Það hefur sýnt sig til dæmis að með því að nota ákveðin öpp í farsímanum, þá ert þú í rauninni búinn að búa til ákveðið aðgengi, jafnvel óprúttinna aðila og þeirra sem hafa ekki gott í hyggju,“ segir Helga.