„Við þurfum ein­hvers staðar að draga saman á móti“

Heiða Björg Hilmisdóttir, formaður Sambands íslenskra sveitarfélaga og nýkjörinn borgarstjóri, ræddi við Erlu Björgu Gunnarsdóttur fréttaþul um kjarasamninga sem Kennarasamband Íslands, ríki og sveitarfélög undirrituðu í gær og tryggir um tólf þúsund félagsmönnum launahækkanir upp á 20 til 25 prósent.

Er búið að kostnaðarmeta þessa samninga, hvað þeir munu kosta fyrir Reykjavík og sveitarfélögin?

 „Ég held að flestir hafi gert ráð fyrir sömu hækkunum og voru á almennum vinnumarkaði. Sá hluti er líklega í áætlunum sveitarfélaga en þessi átta prósent viðbót, það er ekki búið að kostnaðarmeta það. Nú fara öll sveitarfélög að gera það og reyna að sjá fyrir hvernig þau geta komið þessu fyrir í sínum rekstri. Og það verður flókið,“ segir Heiða.

Einhvers staðar þarf að draga saman

Það verður flókið, ertu búin að hugsa fyrir því í Reykjavík?

„Já, við erum auðvitað bara að byrja að skoða það. Þetta er umfram það sem við ætluðum þannig við þurfum einhvers staðar að draga saman á móti,“ sagði hún.

Það eru einhver sveitarfélög sem eru brothætt, standa jafnvel illa. Verður eitthvað stutt við þau? Er einhver sem er búinn að hóa og segja: ,Við getum þetta ekki'?

„Jú auðvitað og það er ástæðan fyrir því að þetta hefur staðið aðeins meira í Sambandi sveitarfélaga en ríkinu,“ segir Heiða.

„Hins vegar viljum við gera þetta vel og við höfum átt góð samtöl við bæði forsætisráðherra og fjármálaráðherra um það hvernig er hægt að mæta þessu. Við erum að fara saman í þessa vegferð að meta virði kennarastarfa og að byggja upp menntakerfið. Það eru miklar og háleitar hugmyndir um það og til þess að við getum gert það þurfum við að hafa fjármagn. Þannig að mögulega náum við að leysa einhver deilumál sem við höfum fjallað um lengi og þá eru færri fréttir af því og meira af einhverju sem er jákvætt,“ segir hún.

Horfa má á myndbandið í spilaranum hér að neðan eftir 2:40 mínútur.

Vinnuvikan ekki styst eins og hjá öðrum

Ásthildur Lóa Þórsdóttir, menntamálaráðherra, fagnaði undirritun kjarasamninganna. Hún sagði kennara ekki hafa fengið metið við sig hversu mikið álagið hefur aukist undandarin ár. Hún segir að fjölga þurfi kennurum þannig að hægt sé að grípa undir og hjálpa börnum og létta álagið á kennurum.

Það hefur verið talað um að það sé mikið álag. Ætlið þið að gera eitthvað í þessu?

„Við erum að hefja sameiginlega vinnu í þessu, að byggja upp menntakerfið og reyna að taka betur utan um þetta. Bæði nýr menntamálaráðherra og fyrrverandi menntamálaráðherra hafa verið öflug. Við höfum tekið þátt í því og við sjáum að við verðum að gera þetta,“ segir Heiða.

Eru einhver dæmi um hvað þið ætlið að gera?

„Vinna með kennurum að því að bæta starfsumhverfi og tryggja þeim símenntun og stytta vinnuviku sem hefur ekki styst hjá kennurum eins og öðrum opinberum starfsmönnum,“ segir hún.

Sveitarfélögin hafi ekki stutt nægilega vel við kennara

Í viðtali í gær við Rakel Svansdóttur, kennara við Flataskóla í rúma tvo áratugi, kom fram að starfið hafi tekið stakkaskiptum á tímabilinu og hnignunarástand hafi byrjað þegar rekstur grunnskólanna færðist frá ríki til sveitarfélaga.

Ráða sveitarfélögin við þetta verkefni?

„Þau ráð vel við þetta verkefni og ég held að flestar rannsóknir hafi ekki sýnt þetta. En auðvitað er það þá upplifun hennar og við þurfum að skoða það. Það hefur orðið gjörbylting á grunnskólunum síðan sveitarfélögin tóku þetta yfir. Það eru 25 ár og við héldum nokkrar ráðstefnur um það í fyrra og fengum þrjár skýrslur þar sem þetta var metið,“ segir Heiða.

„Almennt hafa sveitarfélögin sinnt þessu vel en það hafa verið miklar breytingar, nú er einsetinn skóli, skólamáltíðir, alls konar tómstundir og fleiri námsgreinar komnar inn í grunnskólann, nýjar námsskrár, mörg verkefni og flóknari nemendasamsetning. Og ég held að það sé algjörlega hægt að segja það að við höfum ekki stutt nægilega vel við kennara og í raun umgjörð skólastarfs. Og við ætlum að gera þetta betur,“ segir hún.

Þið lofið bót og betrun.

„Já, en við gerum þetta ekki ein og þess vegna fagna ég þessum samningum og vona að kennarar samþykki þá þannig við getum hafist handa við að byggja upp.“

Það er 24 prósent launahækkun og meira jafnvel meira fjármagn inn í reksturinn og starfið?

„Já, við þurfum að taka betur utan um reksturinn og starfið, kannski kostar það ekki meira,“ segur Heiða.