Taldi mann kominn til landsins til að vinna henni mein

Í tilkynningu frá lögreglunni á Vestfjörðum segir að á níunda tímanum í morgun hafi lögreglunni borist tilkynning um málið. Fyrr í dag var fjallað um þessar lögregluaðgerðir í fjölmiðlum.

Þar segir að fjórir lögreglumenn hafi þá þegar farið frá Ísafirði á vettvang og verið viðbúnir því að þurfa að grípa til vopna. „Til öryggis var sérsveit ríkislögreglustjóra kölluð til aðstoðar, en hún var flutt með þyrlu Landhelgisgæslunnar vestur.“

Í tilkynningunni segir að öryggi fjölskyldunnar og íbúa í Bolungarvík hafi verið tryggt meðan leitað var að manninum sem tilkynnt var um.

„Eftir mikla upplýsingaöflun lögreglunnar í dag er niðurstaðan sú að tilkynnandinn hafi ekki metið aðstæður rétt og sá aðili sem ógnin var talin stafa af ekki á landinu,“ segir í tilkynningunni. Þar kemur jafnframt fram að aðgerðum sé lokið.