„Ég veit bara að þetta er mjög vont“

Öllum er ljóst hvílíkt áfall það er fyrir Ísland að vera án Glódísar í komandi landsleikjum, gegn Noregi á föstudag og Sviss næsta þriðjudag. Það var sömuleiðis áfall fyrir Bayern að vera án Glódísar í einvíginu við Lyon og falla úr keppni í Meistaradeild Evrópu.

Fyrir hana sjálfa hlýtur það svo einnig að vera áfall að geta í fyrsta sinn á ferlinum ekki verið með á æfingum. Geta ekki gert það sem henni finnst skemmtilegast nema finna fyrir óbærilegum verkjum í hné.

Versnaði rosalega í síðustu landsliðsferð

„Ég er með beinmar í hnénu en samt á lærisbeininu. Ég er búin að finna fyrir þessu í svolítinn tíma en svo versnaði þetta rosalega í síðustu landsliðsferð [í lok febrúar]. Þegar ég kom heim úr þeirri ferð gerðist svo eitthvað á æfingu þannig að mér varð svo illt að ég gat ekki haldið áfram að æfa. Síðan þá er ég búin að vera í brasi með þetta,“ segir Glódís við Vísi.

Í myndatöku hafi komið í ljós mjög stórt beinmar í hnénu. Slíkt sé afar óvenjulegt þegar ekki hafi orðið neitt sérstakt slys.

Píndi sig í gegnum lykilleiki á verkjalyfjum

„Læknarnir telja að þetta sé því búið að ágerast yfir mjög langan tíma. Svo hefur eitthvað gerst sem ýtti þessu yfir þannig hjalla að þetta varð allt of vont og ekki hægt að leiða þetta hjá sér lengur.

Ég hef í raun ekki æft fótbolta síðasta mánuðinn. Ég finn verk við öll högg fyrir hnéið. Verk í hverju skrefi þegar ég er að hlaupa.

Þegar þetta varð svona slæmt vorum við akkúrat að fara í mestu lykilleiki tímabilsins svo við ákváðum að reyna á það hvort ég gæti spilað leikina ef ég æfði ekki neitt. Ég náði að spila 55 mínútur gegn Wolfsburg [14. mars], á verkjalyfjum, og sú ákvörðun var tekin bara um morguninn á leikdegi. Eftir það kom risabakslag og ég gat ekki verið með á æfingum í tvær vikur. Svo reyndum við þetta aftur og ég náði að spila við Leverkusen [í fyrradag] en það hefur sömu afleiðingar og síðast,“ segir Glódís.

Hún hefur því fórnað sér eins og hún getur og gert að verkum að þýski meistaratitillinn og bikarmeistaratitillinn eru í augsýn. Núna þarf hún hins vegar algjöra hvíld og hana fær hún í landsleikjahléinu.

Hefði þurft ofurlyf til að mæta Noregi og Sviss

„Ég hefði ekki getað spilað þessa landsleiki [við Noreg og Sviss 4. og 8. apríl]. Það hefði þurft eitthvað ofurlyf til þess. Ég gat ekki skokkað eftir Wolfsburg-leikinn. Þetta er ekki auðvelt val en því miður er þetta staðan. Ég missti líka af leikjunum við Lyon í Meistaradeildinni, draumaleikjum fyrir alla, og það var alveg ömurlegt. Við duttum út þar en höfum náð að koma okkur í frábæra stöðu í deild og bikar

Það eina sem ég get gert í þessu er að hvíla hnéð. Ég mun ekki æfa næstu marga daga. En þetta eru skrýtin meiðsli og ég veit ekkert um tímann sem þetta tekur. Ég veit bara að þetta er mjög vont og það tekur mjög langan tíma fyrir beinmar að lagast.“

Segir EM ekki vera í hættu

Glódís, sem spilað hefur 134 A-landsleiki og er aðeins ellefu leikjum frá meti Söru Bjarkar Gunnarsdóttur, er staðráðin í að fara á sitt fjórða stórmót í júlí. En er Evrópumótið í Sviss í hættu?

„Nei. Ég ætla að segja nei. Ég stefni nú á að þetta verði búið fyrir það. En þetta eru þannig meiðsli að maður veit ekkert. Síðustu fjórar vikur hef ég bara tekið dag fyrir dag,“ segir Glódís sem fagnar þrítugsafmæli rétt fyrir EM.

„Ótrúlega erfitt og sárt“

Glódís viðurkennir að það sé vissulega áskorun að vera í þessum sporum – að missa í fyrsta sinn af leikjum vegna meiðsla.

„Þetta er alveg nýtt fyrir mér – að geta ekki verið inni á vellinum og gert það sem ég er vön að gera. Hjálpað liðinu. En ég hef reynt að horfa á þetta sem lærdóm. Að ég muni vaxa út frá þessu og öðlast betri skilning á þessari hlið á íþróttum líka. En það var ótrúlega erfitt og sárt að sitja og horfa á leikina, sérstaklega í Meistaradeildinni. Það verður líka mjög sárt að horfa á landsleikina í sjónvarpinu.“

Hún hefur síðustu vikur verið í góðu sambandi við Þorstein Halldórsson landsliðsþjálfara og treystir á liðsfélaga sína í landsliðinu til að ná góðum úrslitum í komandi leikjum, til að Ísland haldi sér í A-deild Þjóðadeildarinnar. Leikina, sem fram fara á Þróttarvelli, horfir Glódís á heima í München.

„Ég var í mjög góðu sambandi við Steina og hann var líka í mjög góðu sambandi við Bayern, allan síðasta mánuð. Steini er búinn að vera alveg frábær. Mikill stuðningur í honum. Auðvitað er þetta ótrúlega erfið ákvörðun að taka og mig langar auðvitað að geta verið með landsliðinu en reynslan síðasta mánuðinn segir að það tekur mig tvær vikur að jafna mig eftir leiki, og því miður eru fjórir og átta dagar í leiki. Þetta er of stuttur tími Ég veit að stelpurnar munu standa sig gríðarlega vel í þessu verkefni og hundrað prósent verða okkur til sóma. Við erum með frábæran hóp og það kemur maður í manns stað.“