Rangt að plástrarnir geti læknað sjúkleika eða röskun á líffærastarfsemi

Atli Ísleifsson skrifar 7. apríl 2025 10:19

Neytendastofa sektaði Sif Verslun ehf um 100 þúsund krónur vegna málsins. Vísir/Vilhelm

Neytendastofa hefur sektað Sif Verslun ehf, rekstraraðila netverslunarinnar sifverslun.is, um 100 þúsund króna vegna rangra fullyrðinga um virkni svokallaðra NatPat-plástra sem félagið selur.

Haldið var fram að plástrarnir gætu aukið svefngæði, minnkað stress, þunglyndi, kvíða og þreytu auk þess að vera fullkomnir fyrir þá sem vantar hjálp við einkenni kvíða, ADHD, einhverfu eða bara róa barn sem hefur of mikla orku.

Sagt er frá þessu á vef Neytendastofu. Fram kemur að stofnuninni hafi borist ábending um málið og óskaði í kjölfarið eftir sönnunum fyrir þeim fullyrðingum sem slegið var fram á heimasíðunni.

„Sif Verslun færði ekki fullnægjandi sönnun fyrir fullyrðingunum en á meðan meðferð málsins stóð gerði félagið breytingar á netversluninni sem fól í sér að einstaka fullyrðingar voru fjarlægðar.

Taldi Neytendastofa fullyrðingarnar veita rangar upplýsingar um helstu einkenni NatPat plástranna sem væru líklegar til að valda því að hinn almenni neytandi tæki viðskiptaákvörðun sem hann myndi ekki annars hafa tekið. Fullyrðingarnar væru því líklegar til að raska verulega fjárhagslegri hegðun neytanda. Þá taldi Neytendastofa að með birtingu fullyrðinga um virkni NatPat plástra hafi félagið haldið því ranglega fram að vörurnar gætu læknað sjúkleika eða röskun á líffærastarfsemi.

Taldi stofnunin hæfilegt að sekta félagið um 100.000 kr. vegna brotanna,“ segir á vef Neytendastofu.

Þær fullyrðingar sem Neytendastofa setti út á í málinu voru eftirfarandi:

1) „Plástrarnir skynja UV-geisla sólarinnar og hjálpa til að koma í veg fyrir sólbruna með því að sýna þegar sólarvörn er hætt að virka“,
2) „Plástrarnir eru fullkomnir fyrir þá sem vantar hjálp við einkennum kvíða, ADHD, einhverfu eða bara vantar að róa barn sem hefur of mikla orku“,
3) „…getur ZenPatch hjálpað þér að hafa stjórn á tilfinningum eins og streitu og kvíða með aðstoð mandarínu-, sætar appelsínu-, atlas sedrusvið- og lavenderilmkjarnaolía“,
4) „Fullkomið fyrir þá sem eiga erfitt að sofa á næturnar vegna stíflaðs nefs og þá sem eiga við árstíðarbundin ofnæmi að stríða“,
5) „SleepyPatch plástrarnir hjálpa bæði börnum og fullorðnum að sofna og halda svefni með hjálp ilmkjarnaolía sem róa taugakerfið og hjálpar líkamanum að fara yfir í djúpsvefn“,
6) „eykur svefngæði, minnkar stress, þunglyndi, kvíða og þreytu“,
7) „Örvar heilbrigðari og dýpri Rem svefn“,
8) „MagicPatch plástrarnir eru settir á bit og minnka kláða“,
9) „Plástrarnir eru krosslaga og þegar þeir eru strekktir yfir húðina auka þeir sogæðaflæðið og hjálpa til við að tæma munnvatn flugnanna sem er orsök kláðans“,
10) „Dregur strax úr kláða“ og
11) „Viltu stjórna sykur- og ruslfæðislöngun án þess að skaða samband þitt við mat? CravePatch getur hjálpað!“.

Auglýsinga- og markaðsmál Neytendur

Mest lesið

Fleiri fréttir