For­maðurinn ó­sáttur við tveggja leikja bannið og aga­nefnd

Aron var rekinn af velli undir lok leiks KA og KR á Akureyri á sunnudaginn. Á þriðjudaginn var hann svo úrskurðaður í tveggja leikja bann. Atvikið náðist ekki í sjónvarpsútsendingu en upptaka úr Spiideo-myndavél KA sýnt í Stúkunni á mánudaginn.

Sérfræðingar Stúkunnar voru ekki á því að Aron hefði átt að fá rauða spjaldið. Það voru KA-menn ósáttir við og Sævar Pétursson, framkvæmdastjóri KA, skaut sérstaklega fast á Bjarna Guðjónsson, nýjan sérfræðing Stúkunnar, og benti á að hann ætti nú son í KR-liðinu, Jóhannes Kristinn.

Magnús Orri Marínarson Schram, formaður knattspyrnudeildar KR, var til viðtals í útvarpsþættinum Fótbolta.net á X-inu í dag þar sem hann ræddi um bannið sem Aron var dæmdur í.

„Það eru tveir menn að kljást og dómarinn á myndbrotinu sér klárlega ekki það sem er að gerast. Ég held við getum allir verið sammála um það. Línuvörður eitt sér það ekki heldur og línuvörður tvö er hinum megin og sér þetta varla vel. Að öllum líkindum hefur þetta verið fjórði dómari sem tekur þessa ákvörðun,“ sagði Magnús.

„Það er sett orðalag inn í skýrsluna; ofsaleg framkoma er þetta held ég orðað í skýrslunni sem fer inn til aganefndar. Ég get vel skilið að menn taki þessa ákvörðun. Bekkurinn hjá KA verður brjálaður og það er hiti. Heyrðu, svo bara rautt á manninn. Hann fór í andlitið á honum. Svo koma myndbandsupptökur af því sem gerist og það er viðtal við umræddan KA-mann [Andra Fannar Stefánsson] og þá er þetta kannski ekki eins og fólk hélt að þetta væri.“

KR-ingum var gefinn kostur á að koma andmælum á framfæri þegar mál Arons var tekið fyrir hjá aganefnd og þeir sendu inn í myndbandið sem var sýnt í Stúkunni. Það bar hins vegar ekki tilætlaðan árangur og Aron var dæmdur í tveggja leikja bann.

„Skoðun mín er þessi: Ég tel að dómarinn hefði annað hvort átt að hnippa í aganefndina eða láta hafa eitthvað eftir sér að þetta hafi ekki verið svona ofsaleg framkoma eins og myndbandið sýnir,“ sagði Magnús sem vill meina að aganefndin hefði átt að afgreiða málið á annan hátt.

„Vinnulagið er þannig er að málsaðilum er gefinn kostur á að koma fram með gögn sem aganefndin á að taka sjálfstæða afstöðu til. Þess vegna finnst mér tveggja leikja bann of langt seilst. Ég skil vel einn leikur í bann en eftir á, fyrst þessu verklagi var komið á, að það er hægt að kalla inn gögn og taka afstöðu til gagna, þá á dómarinn annað hvort að grípa inn í, eftir að hafa séð gögnin, eða aganefndin. Þetta á bara að vera lærdómur fyrir þetta ferli.“

Hlusta má á viðtalið Magnús í spilaranum hér fyrir ofan. Umræðan um bann Arons hefst á 1:24:00.

Leikur KA og KR endaði með 2-2 jafntefli. KR-ingar luku leik níu inni á vellinum en Hjalti Sigurðsson var rekinn af velli í uppbótartíma þegar hann fékk sitt annað gula spjald.

Aron, sem er nýr fyrirliði KR, missir af leik liðsins gegn Val á AVIS-vellinum í Laugardalnum á mánudaginn og leik gegn FH í Kaplakrika 23. apríl.