Ein­hleypir þokkasveinar

Stefán Einar Stefánsson- 41 árs

Stefán hefur stimplað sig inn í huga og hjarta margra í gegnum skjáinn í þættinum Spursmál og er óneitanlega umdeildur. Hann er ekki bara glæsilegur heldur einnig sérfróður um kampavín, maður sem kann að lyfta glasi við rétt tækifæri.

Geoffrey Þ. Huntingdon-Williams - 36 ára

Miðbæjarprinsinn og eigandi Priksins Geoff er sjarmerandi kúltúrkarl sem þekkir takt íslensks menningarlífs eins og lófann á sér. Hann er með nefið fyrir réttu stemningunni, augun á smáatriðunum – og hjartað á réttum stað.

Aron Már Ólafsson -32 ára

Aron er einn huggulegasti leikari landsins, þekktur fyrir leik í þáttum eins og Verbúðinni, Svörtum söndum, Ófærð og Venjulegu fólki.  Aron var meðal fyrstu samfélagsmiðlastjarnanna á Íslandi og vakti athygli með fyndnum Snapchat-innslögum árið 2015. Einhleypur, sjarmerandi og með húmorinn upp á tíu – Aron er einfaldlega draumur í dós.

Hektor Bergmann - 20 ára

Hektor spilar með knattspyrnufélaginu ÍA á Akranesi. Hann er sonur Ísdrottningarinnar Ásdísar Ránar Gunnarsdóttur og fyrrverandi knattspyrnukappans Garðars Gunnlaugssonar. Það er því ekki furða að hann hafi fengið knattspyrnuhæfileikana og útlitið í sængurgjöf. Sannkallaður gæðadrengur!

Ragnar Jónasson rithöfundur - 49 ára

Rithöfundurinn Ragnar Jónasson veit hvernig á að halda lesendum við efnið, og hver veit nema næsta saga verði rómantísk? Einhleypur og vel lesinn, með ástríðu fyrir bókmenntum og norrænum  dulúðleika. Glæpasagnahöfundurinn vinsæli er ekki bara meistari spennunnar, hann er líka einhleypur.

Jón Davíð Davíðsson - 37 ára

Jón Davíð er athafnamaður sem hefur áhrif – hvort sem hann er að opna nýjan stað eða leiða nýja bylgju í menningarlífinu. Með Húrra Reykjavík, Flatey, Yuzu, Auto og Nínu hefur hann breytt landslagi Reykjavíkur á ótrúlega hátt. Einhleypur, stílhreinn og með skýra framtíðarsýn – maður sem fer ekki bara með straumnum heldur skapar hann sjálfur.

Magnús Leifsson leikstjóri - 42 ára

Magnús, margverðlaunaður leikstjóri, sem er þekktastur er fyrir tónlistarmyndbönd sín og samstarf við margt okkar þekktasta tónlistarfólk. Undanfarið hefur hann vakið verðskuldaða athygli fyrir þættina Draumahöllin, þar sem Saga Garðars og Steindi Jr. fara með aðalhlutverkin. Magnús er ekki bara á lausu, heldur líka á flugi!

Jóhann Kristófer Stefánsson - 32 ára

Jóhann Kristófer, betur þekktur sem Joey Christ, er rappari, leikstjóri og maðurinn á bak við Æði-seríurnar fimm. Forvitni og innsæi einkenna hann, sem gerir honum kleift að vera alltaf með á nótunum. Hann hefur einstaka hæfileika til að laða fólk að sér, en heldur einkalífi sínu utan við sviðsljósið.

Arnór Sigurðsson - 25 ára

Arnór, sem er landsliðsmaður íslenska karlalandsliðsins, þykir með huggulegri piparsveinum landsins. Skarpir kjálkar og seiðandi augnaráð heilla hverja dömuna á fætur annarri. Hann er óhræddur við að gefa fylgjendum sínum á samfélagsmiðlum innsýn inn í líf sitt, innan sem utan vallarins. Arnór er í toppformi, með góða nærveru og hjarta sem mögulega er á lausu.

Danni Deluxe - 40 ára

Plötusnúðurinn Daníel Ólafsson, eða Danni Deluxe. Ljóshærði sjarmurinn með blíða brosið og taktinn á hreinu. Hann byrjaði að snúa plötur aðeins þrettán ára gamall og hefur verið virkur í íslensku tónlistarlífi æ síðan. Danni spilar reglulega á helstu klúbbum landsins og var einnig meðlimur í rappsveitinni Bæjarins Bezt, ásamt Dóra DNA og Kjartani Atla Kjartanssyni.

Flóni - 27 ára

Tónlistarmaðurinn Friðrik Róbertsson, betur þekktur sem Flóni, heillar með sínu blíða brosi og töffaralega klæðaburði. Rapparinn Flóni er nýverið kominn úr sambandi. Flóni skaust upp á stjörnuhimininn fyrir rúmum sjö árum og er einn hæfileikaríkasti rappari landsins.