Mót­mæla hagræðingum og segja þær bitna á konum

„Horfast þarf í augu við þá staðreynd að skattar hafa verið lækkaðir á undangengnum kjörtímabilum án þess að afl að hafi verið tekna á móti og hefur ríkissjóður því verið rekinn með halla um árabil,“ segir í fréttatilkynningu um umsögnina.

BSRB hvetji ríkisstjórnina til að afla frekari tekna til að tryggja að ríkið geti sinnt meginverkefnum sínum, sem séu að halda uppi öflugu velferðarkerfi þar sem allir búi við örugga framfærslu, framúrskarandi heilbrigðis- og félagsþjónustu, menntun, jafnrétti og öryggi óháð búsetu og efnahag ásamt innviðafjárfestingu.

Hagræðing bitni helst á konum

Í tilkynningu segir að rúmlega sjötíu prósent starfsfólks hins opinbera séu konu og þær nýti þjónustu hins opinbera meira og njóti tilfærslna í meira mæli en karlar. 

„Hagræðing í opinberum rekstri bitnar því sérstaklega á starfsaðstæðum og lífskjörum kvenna og því þarf að horfa til áhrifa á kynin þegar ákvarðanir í opinberum fjármálum eru teknar.“

Í greinagerð með fjármálaáætlun sé ítrekað bent á þá áskorun sem felst í skorti á fólki til starfa í velferðarkerfinu. Þrátt fyrir þessa stöðu verði ekki séð að auka eigi fjárframlög sjúkrahúsa og heilbrigðisþjónustu utan sjúkrahúsa nema til að mæta lýðfræðilegri þróun. 

BSRB leggi áherslu á að auka þurfi fjárheimildir til heilbrigðiskerfisins til að bæta heilbrigðisþjónustu í landinu en forsenda þess sé að dregið verði úr manneklu, veikindatíðni, starfsmannaveltu og starfsumhverfi bætt. BSRB mótmæli einnig harðlega niðurskurði í mennta- og menningarmálum.

Ósvífið að bæta kjör öryrkja á kostnað atvinnulausra

BSRB hafni því alfarið að nýtt örorkulífeyriskerfi verði fjármagnað með niðurfellingu á framlögum ríkisins til jöfnunar örorkubyrði lífeyrissjóða og styttingu atvinnuleysistryggingatímabilsins. 

„Bætt kjör örorkulífeyrisþega eru fagnaðarefni en það er ósvífið að þær umbætur séu fjármagnaðar með lífeyriskjörum láglaunafólks og afkomu fólks á atvinnuleysisskrá.“

BSRB leggi áherslu á að haldið verði áfram að draga úr tekjuskerðingum barnabóta, hækka hámarksgreiðslur í fæðingarorlofi eftir árið 2026 og tryggja afkomu þeirra tekjulægstu í fæðingarorlofi. Engin skýr áform sé að finna um þessi mikilvægu fjölskyldumál í fjármálaáætluninni.

Hvetja stjórnvöld til að setja háleit markmið

Loks segir að BSRB hvetji stjórnvöld til að setja sér háleit markmið um gæði opinberrar þjónustu og gera starfsaðstæður starfsfólks ríkisins að forgangsmáli og draga þannig úr veikindakostnaði og þeim kostnaði sem felst í starfsmannaveltu. Með þessum aðgerðum megi ná fram verulegri hagræðingu til lengri tíma, auk þess sem ríkisstjórnin myndi sýna hugrekki og marka árangursrík spor í sögu þar sem hagræðingaraðgerðir hafa reynst árangurslitlar og oft skaðlegar.

Lesa má nánar um afstöðu BSRB í umsögn bandalagsins um tillögur til þingsályktunar um fjármálastefnu fyrir árin 2026-2030 og um fjármálaáætlun fyrir árin 2026-2030, 223. og 264. mál hér.