Sjáðu þrjá­tíu sekúndur af at­riði VÆB í Euro­vision

Önnur æfing hópsins fór fram í morgun og má sjá brot af henni á Facebook-síðu Eurovision. Þar má sjá þá Matthías og Hálfdán ásamt teymi sínu fara á kostum í þrjátíu sekúndur. Birt verða hálfs mínútna löng myndbönd af öllum atriðum í aðdraganda keppninnar.

Nokkuð hefur verið unnið í atriðinu síðan VÆB stóð uppi sem sigurvegari í Söngvakeppninni í febrúar. Áhorfendur þurfa þó að bíða til þriðjudags til að sjá atriðið í heild sinni.

VÆB opnaði verslun í Kringlunni í dag í tengslum við þátttöku sína í keppninni. Þar verður hægt að kaupa ýmis konar varning tengdan sveitinni, þar á meðal VÆB-galla, húfur og derhúfur.