Hiti getur farið yfir 20 stig

Undanfarnir dagar hafa verið með hlýrra móti og ekki virðist lát á því fram í miðja vikuna.

„Allmikil hæð milli Íslands og Færeyja stýrir veðrinu, og í dag er útlit fyrir hæga breytilega átt eða hafgolu og víða bjart veður, en líkur á þoku við suður- og austurströndina.“

„Áfram mjög hlýtt í veðri, og getur hiti víða farið yfir 20 stig inn til landsins, en heldur svalara í þokulofti við sjávarsíðuna,“ segir í hugleiðingum veðurfræðings.

Á morgun og á þriðjudag er útlit fyrir svipað veður, víða sólríkt og hlýtt, en þá sækir þokuloft einnig að vestur- og norðurströndinni og heldur svalara þar.