Á­fram hlýtt og bjart en lægð nálgast

Á vef Veðurstofunnar segir að hiti verði sex til tuttugu stig að deginum, hlýjast inn til landsins, en svalast í þokulofti.

„Hæðin sem stjórnað hefur veðrinu hjá okkur síðustu viku hörfar til austurs á morgun og lægð nálgast úr suðvestri. Þá gengur í suðaustan strekking vestantil á landinu og fer að rigna eftir hádegi. Hægari vindur fyrir austan og bjart, en þykknar upp annað kvöld. Hiti 10 til 22 stig, hlýjast norðaustanlands.

Á föstudag er síðan útlit fyrir suðlæga átt með rigningu, en talsverðri rigningu á Suðausturlandi. Seinni partinn styttir síðan upp að mestu á vestanverðu landinu. Hiti 8 til 15 stig, hlýjast norðan heiða,“ segir í hugleiðingum veðurfræðings.

Veðurhorfur á landinu næstu daga

Á fimmtudag: Gengur í suðaustan 10-15 m/s vestantil og fer að rigna seinnipartinn. Hægari vindur og bjart um landið austanvert, en þykknar upp um kvöldið. Hiti 10 til 22 stig, hlýjast norðaustanlands.

Á föstudag: Suðaustlæg eða breytileg átt 5-15 og rigning með köflum, en talsverð rigning suðaustanlands. Hiti 8 til 16 stig, hlýjast norðaustantil.

Á laugardag: Fremur hæg breytileg átt, skýjað og dálítil væta öðru hverju. Hiti 6 til 13 stig.

Á sunnudag: Norðaustanátt og dálítil rigning um landið norðan- og austanvert. Hiti 6 til 15 stig, hlýjast suðvestantil.

Á mánudag: Norðanátt og dálítil rigning, en þurrt sunnan heiða og bjart með köflum. Hiti 5 til 15 stig, hlýjast syðst.

Á þriðjudag: Norðlæg eða breytileg átt og líkur á skúrum.