„Hæ allir saman, kjósið New Day Will Rise“

Í yfirlýsingu frá Martin Green, stjórnanda Eurovision, sem birt var á heimasíðu keppninnar í morgun segir að sambandið hafi hlustað á viðbrögð aðildarstöðva, aðdáenda og fjölmiðla eftir keppnina í Basel. Þar vann Austurríkismaðurinn JJ keppnina en Ísrael hafnaði öðru sæti. Ísrael fékk tæplega 300 stig frá almenningi sem var mesta fylgið í kosningu almennings.

Green segir í bréfinu vilja tryggja að markaðs- og kynningarstarf þátttökuþjóðanna hafi ekki óeðlilega mikil áhrif á eðlilega þátttöku fólks í kosningu almennings. 

Allt bendir til þess að Ísraelar hafi sett mikla fjármuni í að markaðssetja framlag sitt bæði á Google og YouTube. Rannsókn Eurovision News Spotlight, sem rekið er af EBU, sýnir að auglýsingastofa ísraelsku ríkisstjórnarinnar auglýsti framlag Ísraela grimmt í aðdraganda keppninnar. Almenningur í þátttökulöndum Eurovision var hvattur til að greiða Ísrael atkvæði sitt. 

Með auglýsingunum fylgdi áminning að greiða mætti framlaginu alls tuttugu sinnum atkvæði sitt. Þótt leyfilegt sé að kynna framlag síns lands hefur verið bent á að aðgerðir sem þessar kunni að stangast á við anda keppninnar með því að pólitískt væða eða nýta atkvæðagreiðsluferlið í eigin þágu.

Hæ allir saman!

Í auglýsingu sem beint var til Íslendinga, og sjá má að neðan, eru áhorfendur ávarpaðir á íslensku og hvattir til að styðja við Ísrael. 

„Hæ allir saman, kjósið New Day Will Rise“.

Ávarpinu fylgja upplýsingar um númer Ísraels í keppninni, að kjósa megi tuttugu sinnum og slóð til að horfa á ísraelska framlagið.

Sambærilegar auglýsingar voru gerðar fyrir aðrar þátttökuþjóðir þar sem ávarpið er á móðurtungu þátttökuþjóðarinnar.

 „Slíkt kynningarstarf er leyfilegt samkvæmt reglum keppninnar og er ætlað til að styðja við listamennina, auka sýnileika þeirra og styðja við feril þeirra – það er hluti af tónlistarbransanum – en við viljum tryggja að slíkt hafi ekki óeðlilega mikil áhrif á hvatningu samfélaga og minnihlutahópa til að kjósa,“ segir Green í yfirlýsingunni.

Reglur Eurovision heimila þátttökuþjóðum og samstarfsaðilum þeirra að markaðssetja lög og flytjendur fyrir keppni. Slíkt kynningarstarf getur falið í sér tónleikaferðir, markaðssetningu á samfélagsmiðlum og stuðningsherferðir á netinu. 

EBU hyggst nú meta hvort slík starfsemi geti haft ójafnvægi í för með sér þegar kemur að áhrifum á atkvæðagreiðslu almennings.

Þá mun EBU jafnframt skoða regluna sem heimilar hverjum einstaklingi að greiða allt að 20 atkvæði á hverja greiðsluleið. Áhorfendur geta greitt atkvæði með þrenns konar hætti:

• Með því að senda SMS með númeri lagsins.
• Með því að hringja í símanúmer sem tengt er tilteknu lagi.
• Með því að greiða atkvæði á netinu í gegnum opinbera Eurovision-síðuna eða app keppninnar, gegn greiðslu.

Hver þessara leiða telst sérstök greiðslumáta og því getur sami einstaklingur greitt allt að 60 atkvæði ef hann nýtir allar þrjár.

Green segir ekki vísbendingar um að fyrirkomulagið hafi skekkt niðurstöður, en þar sem spurningar hafi vaknað verði málið skoðað gaumgæfilega nú í júní. 

Ísland, Spánn, Írland, Finnland, Belgía og Holland hafa í kjölfar úrslitanna lýst yfir áhyggjum og rætt við EBU um mögulega skoðun á niðurstöðum kosningar almennings í eigin löndum. Norðmenn hafa sömuleiðis beðið um að kosningakerfið verði tekið til skoðunar. Slóvenar og Slóvakar hafa líka kallað eftir að tekin verði afstaða til þátttöku Ísraels í framtíðinni í ljósi stríðsins á Gasa.