„Ég hefði getað sett þrjú“

Stígur skoraði fyrsta markið fyrir Víking í Reykjavíkurmótinu í vetur. Hann var hins vegar ólöglegur, ekki búinn að fá leikheimild eftir að hafa skipt til Víkings frá Triestina á Ítalíu. Markið og úrslit leiksins voru því dæmd ógild og Leiknir dæmdur 3-0 sigur.

Stígur sagði það sætara að vita að markið yrði ekki tekið af honum núna eftir á.

Hann skoraði fyrsta mark leiksins, eftir stoðsendingu Helga Guðjónssonar sem skoraði annað markið. Víkingar gáfu ÍA síðan klaufalegt færi á sér rétt fyrir hálfleik, sem gestirnir nýttu til að minnka muninn.

„Mér fannst við miklu betri í þessum leik, bara eitt lið á vellinum nánast allan leikinn. 2-1 finnst mér ekki útskýra hvernig leikurinn var. Frábær leikur hjá okkur öllum“ sagði Stígur.

Fleiri mörk voru ekki skoruð í seinni hálfleiknum en Stígur var óheppinn að setja ekki annað mark, boltinn skoppaði í báðar stangirnar og út. Hann fór síðan illa með algjört úrvalsfæri.

„Ég hefði getað sett þrjú sko. Veit ekki hversu oft hann fór í stöngina þarna. Svo kom Valdimar með góða sendingu en ég náði ekki alveg jafnvægi og náði ekki að pota honum inn, en bara sáttur með sigurinn.“

Stígur sagði tímabilið fara vel af stað hjá Víkingum, sem settust með sigrinum í efsta sæti deildarinnar. Breiðablik getur þó tekið toppsætið af þeim með sigri gegn FH í Kaplakrika á morgun.

„Mér finnst við besta liðið í deildinni og finnst við líka eiga meira inni.“

Stígur byrjaði leikinn á vinstri vængnum en endaði hann hægra megin og var því að lokum spurður hvoru megin honum liði betur.

„Vinstra megin. Mér finnst betra að geta farið inn með boltann, ég er náttúrulega hægri fótar, gott að geta köttað inn eins og þegar ég skaut í stöngina. Gott að geta farið inn og skotið með hægri… Svo get ég líka spilað á miðjunni en hef ekki spilað þar mikið.“