Fótbolti

Stelpurnar hennar Betu réðu ekki við heimsmeistarana í lokin

Óskar Ófeigur Jónsson skrifar
Elísabet Gunnarsdóttir er þjálfari belgíska landsliðsins en hennar konur héldu ekki út í kvöld.
Elísabet Gunnarsdóttir er þjálfari belgíska landsliðsins en hennar konur héldu ekki út í kvöld. Getty/Peter De Voecht

Elísabet Gunnarsdóttir og lærisveinar hennar í belgíska landsliðinu stóðu í heimsmeisturum Spánar fram eftir leik en urðu að lokum að sætta sig við stórt 5-1 tap á heimavelli í Þjóðadeildinni í kvöld.

Belgísku stelpurnar unnu óvæntan sigur á enska landsliðinu í síðasta leik en náðu ekki að fylgja því eftir í kvöld.

Esther Gonzalez skoraði fyrstu tvö mörkin fyrir spænska liðið í kvöld og Athenea del Castillo bætti síðan við tveimur mörkum í blálokin. Fimmta markið skoraði síðan Alba Redondo.

Fyrra markið skoraði Esther á 36. mínútu en bætti síðan við öðru marki á 64. mínútu.

Athenea del Castillo kom inn á sem varamaður á 61. mínútu og skoraði síðan með mínútu millibili á lokakafla leiksins, á 78. og 79. mínútu.

Alba Redondo skoraði síðasta markið á 85. mínútu en hún hafi skömmu áður komið inn á sem varamaður. Tine de Caigny náði að laga aðeins stöðuna á lokasekúndum leiksins.

Spænski liðið hefur unnið fjóra af fimm leikjum sínum í riðlinum en belgíska liðið er á botni riðilsins með þrjú stig af fimmtán mögulegum og markatöluna 5-16.

Þjóðverjar sýndu styrk sinn með 4-0 sigri á Hollendingum á sama tíma. Lea Schüller skoraði tvö mörk en hin mörkin skoruðu þær Sarai Linder og Linda Dallmann.  Þetta voru tvö efstu liðin í þeim riðli og Þjóðverjar tryggðu sér sigurinn í honum.




Fleiri fréttir

Sjá meira


×