Dómarinn fékk gult spjald og glotti

Hinn virti dómari Rohit Saggi sá um dómgæsluna í 4-2 sigri Íslendingaliðsins Brann á Kristiansund, í norsku úrvalsdeildinni í fótbolta, og var ansi mikið í sviðsljósinu.

Hann húðskammaði til að mynda Rezan Corlu, danskan leikmann Kristiansund, sem hafði verið að hreyta ónotum í andstæðing sem lá í grasinu eftir brot.

Saggi fékk svo sjálfur gult spjald í seinni hálfleiknum, eftir að hafa óvart veitt Niklas Ødegård í liði Kristiansund högg þannig að hann féll til jarðar. 

Atvikið má sjá hér.

Ødegård þurfti tíma til að jafna sig en þegar hann var kominn á fætur rétti Saggi honum gula spjaldið svo að Ødegård gæti lyft því, og „spjaldað“ dómarann. Báðir virtust geta hlegið að atvikinu þó að Ødegård væri sjálfsagt ekki skemmt yfir stöðunni í leiknum sem Brann vann eins og fyrr segir 4-2.

Eggert Aron Guðmundsson lagði upp eitt marka Brann, sem leikur undir stjórn Freys Alexanderssonar. Liðið komst með sigrinum upp í 2. sæti deildarinnar nú þegar þriggja vikna sumarfrí tekur við. Viking er með sex stiga forskot á toppnum, eftir 1-0 útisigur gegn Molde í kvöld, en Brann á leik til góða.