Koma aftur saman eftir sögu­legar á­rásir í Rúss­landi

Rustem Umerov, varnarmálaráðherra, leiðir úkraínsku sendinefndina og Vladimir Medinskí, ráðgjafi Vladimírs Pútín, forseta, leiðir þá rússnesku.

Pútín hefur sagt að Rússar muni skrifa minnisblað um skilyrði sín fyrir mögulegum friði en Úkraínumenn sögðu um helgina að það hefði ekki borist enn. Rússar fengu sambærilegt minnisblað frá Úkraínumönnum í gær og segjast ætla að bregðast við því í dag, samkvæmt frétt Reuters.

Væntingar til fundarins eru ekki miklar en ekkert gefur til kynna að Rússar séu tilbúnir til að draga úr kröfum sínum á nokkurn hátt. Kröfur Rússar á síðasta fundi voru umfangsmiklar og var haft eftir Medinskí eftir fundinn að Rússar væru tilbúnir til að halda hernaðinum áfram um árabil.

„Kannski munu einhverjir sem sitja hérna við borðið missa fleiri ástvini. Rússland er tilbúið til að berjast að eilífu,“ var haft eftir Medinskí.

Fyrri viðræðurnar í Istanbúl leiddu þó til fjölmennustu fangaskipta ríkjanna hingað til.

Sjá einnig: Óásættanlegar kröfur frá Rússum á stuttum fundi

Úkraínumenn munu samkvæmt Reuters leggja sínar línur á fundinum. Meðal annars muni þeir ekki sætta sig við takmarkanir á stærð herafla þeirra, ekki viðurkenna eignarhald Rússa á hernumdum svæðum og þá vilja Úkraínumenn skaðabætur frá Rússum vegna innrásarinnar.

Bæði Rússar og Úkraínumenn eru í raun að reyna að sýna Donald Trump, forseta Bandaríkjanna, að þeir séu tilbúnir til friðarviðræðna en andstæðingar þeirra séu það ekki. Trump og hans ráðgjafar hafa gefið til kynna að þeir séu tilbúnir til að stíga frá samningaborðinu og hafa einnig gefið til kynna að þeir gætu hætt stuðningi við Úkraínu, sem yrði mikill sigur fyrir Pútín.

Mikill skaði fyrir Rússa

Árásir Úkraínumanna á flugvellina í Rússlandi í gær eru líklega þær metnaðarfyllstu sem gerðar hafa verið í Rússlandi frá því innrás Rússa í Úkraínu hófst í febrúar 2022.

Úkraínumenn smygluðu 117 drónum inn í Rússland, samkvæmt Vólódímír Selenskí, forseta, og komu þeim fyrir í þökum smárra gámahúsa. Þeim var svo ekið að flugvöllunum og að virðist í einhverjum tilfellum án þess að ökumenn vörubílanna vissu hvaða farm þeir voru með.

Sjá einnig: „Köngulóarvefur“ sem skrifað verður um í sögubókum

Þegar á staðinn var komið var drónunum flogið frá húsunum og að flugvöllunum, þar sem þeim var flogið á flugvélar.

Sjá einnig: Sprengjuflugvélar loga víða í Rússlandi

Úkraínumenn sögðust í gær hafa grandað eða skemmt rúmlega fjörutíu flugvélar í árásunum. Enn sem komið er hefur lítið verið staðfest í þeim efnum og er vonast til þess að gervihnattamyndir geti fljótt varpað ljósi á hver mikill skaðinn var raunverulega.

Myndefni hefur hingað til staðfest að Úkraínumenn hafi grandað á annan tug flugvéla af mismunandi gerðum. Þar á meðal eru sprengjuvélar sem hafa verið notaðar til að skjóta eldflaugum að úkraínskum borgum og bæjum og geta borið kjarnorkuvopn.

Fáar slíkar flugvélar eru framleiddar í Rússlandi þessa dagana og verður erfitt fyrir Rússa að bæta fyrir tjónið. Hver dróni sem notaður var til árásarinnar kostar ef til vill nokkra tugi þúsunda króna en flugvélarnar kosta hundruði milljóna.

Árásir gærdagsins munu líklega ekki hafa gífurlega mikil áhrif á aðstæður á víglínunni í Úkraínu en þær munu væntanlega létta álagið á loftvörnum Úkraínumanna um tíma og draga úr árásum á borgir landsins.

Lítil umfjöllun í Rússlandi

Lítið sem ekkert hefur verið fjallað um árásirnar í ríkismiðlum Rússlands. Þær þykja mikil skömm fyrir Pútín en rússneskir herbloggarar og málpípur Kreml hafa talað um gærdaginn sem „Pearl Harbor“ Rússlands.

Hver viðbrögð Rússa við árásinni verða munu líklega koma fljótt í ljós. Meðal annars gæti Pútín, eins og bent er á í grein Sky News, hótað notkun kjarnorkuvopna enn einu sinni.

Fyrri árásir Úkraínumanna í Rússlandi hafa leitt til sambærilegra viðbragða áður og einnig frekari eldflaugaárása á Úkraínu.