Aron Kristinn og Lára keyptu ný­stár­lega miðbæjarperlu

Aron hefur gert garðinn frægan með hljómsveitinni ClubDub. Þeir hafa gert garðinn frægan með lögum á borð við Bad bitch í Reykjavík og Aquaman. Lára er viðskiptafræðingur, jógakennari og starfar hjá KPMG sem sérfræðingur í sjálfbærni. Þau hafa verið saman í rúm tíu ár og eiga von á sínu fyrsta barni á næstu vikum. 

Aron og Lára keyptu íbúðina af Jónu Maríu Ólafsdóttur, verkefnastjóra hjá Siðmennt, og Andrési Fjeldsted, lögfræðingi. Þau eignuðust íbúðina árið 2020 og gerðu hana upp á stílhreinan og smekklegan hátt þar sem ljósir og mjúkir litir ráða ríkjum.

Fagurfræði og heillandi smáatriði

Íbúðin skiptist í opið og fallegt stofurými með ljósu síldarbeinaparketi á gólfum. Tvöföld frönsk hurð aðskilur stofuna frá anddyri og gefur heildarmyndinni sjarmerandi yfirbragð. Úr stofunni er gengið út á suðursvalir. Upprunalegir hvítir skrautlistar og rósettur í lofti gefa rýminu klassískt og glæsilegt yfirbragð.

Eldhúsið er opið inn í stofu og búið ljósgrárri innréttingu, stórri eyju og ljósum steini á borðplötum. Ljósar flísar á veggjum setja fallegan svip á rýmið, og hugað hefur verið að hverju smáatriði.

Baðherbergið var endurnýjað fyrir nokkrum árum. Það er með ljósri innréttingu með eikarframhlífum frá Haf Studio og borðplötu úr kvartssteini.