Stöðvaði miða­sölu um leið og hann áttaði sig á stöðu mála

Þeir sem komu að skipulagi og framkvæmd tónleikanna funduðu í dag með lögreglu og slökkviliði vegna tónleikanna, þar sem mikil örtröð myndaðist eftir að þríeykið í FM95Blö hafði lokið við að spila fyrir gesti hallarinnar. Fimmtán manns leituðu á bráðamóttöku og einn var lagður inn á sjúkrahús.

Fulltrúar Íþrótta- og sýningarhallarinnar hf., sem annast rekstur Laugardalshallar, Nordic Live Events, sem setti upp tónleikana, og Icelandic Security, sem annaðist öryggisgæslu á tónleikunum, sátu fundinn ásamt fulltrúm lögreglu og slökkviliðs.

Allir hafi farið yfir sinn þátt

Ásmundur Rúnar Gylfason, aðstoðaryfirlögregluþjónn hjá lögreglunni á höfuðborgarsvæðinu, segir í samtali við fréttastofu að á fundinum hafi verið rýnt í aðdraganda tónleikanna, umsókn um leyfi fyrir þeim, framkvæmd þeirra og allt annað sem viðkom tónleikunum.

„Það höfðu auðvitað allir hlutaðeigandi farið yfir sína verkþætti eftir tónleikana. Við áttum bara mjög góðan fund,“ segir Ásmundur.

Fyrir liggi að of margir miðar hafi verið seldir á tónleikana, miðað við útgefið tækifærisleyfi. Það hafi gert ráð fyrir átta þúsund manns. 

„Það voru rétt rúmlega þúsund fleiri,“ segir Ásmundur. Það mál verði tekið til skoðunar hjá lögreglunni, óháð efni fundarins í dag.

Enginn ásetningur

Eins liggi fyrir að húsið hafi verið opnað of snemma miðað við leyfið. 

„En það komu útskýringar á þessu. Mannleg mistök, samskiptaleysi eða misskilningur milli tónleikahaldara og þess sem sækir um leyfið, sem er húsið,“ segir Ásmundur.

Sjá einnig: „Beðið um leyfi fyrir átta þúsund manns“

Hann segir engan ásetning hafa verið til staðar, hvorki til þess að selja fleiri miða en leyfið gerði ráð fyrir né að byrja utan tilsetts tíma. Bæði megi skrifa á misskilning og skort á samskiptum.

Viðbragðsaðilar líti líka inn á við

„Við áttum opin samskipti með það hvað hefði betur mátt fara og allir hlutaðeigandi voru sammála um það að það hafi verið hlutir sem hefðu mátt gera það, bæði í aðdragandum og á tónleikunum sjálfum.“

Ásmundur nefnir sérstaklega skipulag og framkvæmd öryggisgæslu í því samhengi, en einnig samskipti tónleikahaldara og þeirra sem fari með stjórn húsnæðisins, sem hafi mátt vera þéttari og betri.

„Eftirlitsaðilarnir, lögregla og slökkvilið, við þurfum líka að horfa inn á við og skoða verkferla við framkvæmd svona viðburða hjá okkur,“ segir hann.

Menn verði að læra af atvikinu

Björgvin Þór Rúnarsson, eigandi Nordic Live Events, segir í samtali við fréttastofu að á fundinum með viðbragðsaðilum og öðrum sem komu að tónleikunum hafi verið farið víðtækt yfir sviðið.

„Menn eru sammála um að við verðum að læra af þessu og gera enn betur. Og ekki bara við heldur allir tónleikahaldarar á Íslandi,“ segir Björgvin.

Til standi að einfalda verkferla, þannig að viðbragðsaðilar og allir sem komi að skipulagningu tónleika sem þessara komi fyrr að borðinu og geti rætt það sem þurfi að gera, svo ganga megi úr skugga um að allt sé í lagi.

Hljóp niður í box

Björgvin segir rétt að of margir miðar hafi verið seldir miðað við leyfið. Seldir umframmiðar hafi verið 336 talsins.

„Þegar ég átta mig á þessu þá hleyp ég strax niður í box og stöðva miðasöluna hjá Tix,“ segir Björgvin um viðbrögð sín á tónleikadeginum.

Auk ofseldu miðanna hafi verið gefnir út boðsmiðar, sem bæst hafi ofan á. Þar með hafi útgefnir miðar verið orðnir rúmlega þúsund fleiri en þeir áttu að vera.

„Það er engin græðgi. Ég áttaði mig bara ekki nógu snemma á því, og stöðvaði miðasöluna. Tix og lögreglan geta vitnað um það,“ segir Björgvin.

Aldrei lent í öðru eins

Björgvin segir því mannleg mistök hafa ráðið því hvernig fór, bæði hvað varðar miðasöluna og tímaramma tónleikanna.

„Ég tek þau á mig. Mér þykir þetta alveg ótrúlega leitt. Ég er búinn að vera í viðburðahaldi í 20 ár, og ég hef aldrei lent í svona. Ég er búinn að halda 87 viðburði, og ég hef aldrei lent í svona aðstæðum eins og ég hef lent í núna,“ segir hann.

Björgvin segir tónleikana að mestu hafa gengið vel, og margt hafi verið gert þar sem viðburðahaldarar geti verið stoltir af.

„Atvikið sem varð þarna, ég geri ekki lítið úr því og ég geri ekki lítið úr upplifun þessa hóps sem lenti í þessu. En mig langar líka að koma því á framfæri að tónleikarnir og öll umgjörð voru stórkostleg. Þetta atvik sem gerist þarna er vegna þess að öryggisgæslan var ekki næg þarna frammi. Lögreglan steig inn í og gerði það frábærlega, ásamt starfsfólki hallarinnar og okkar í Nordic Live. Mig langar bara að þakka þessu fólki fyrir, og koma því á framfæri að þetta fólk stóð sig frábærlega.“

Blö-drengir hringja í tónleikagesti

Fréttastofa hefur fengið veður af því að þeir Auðunn Blöndal, Egill Einarsson og Steinþór Hróar Steinþórsson, sem saman mynda FM95Blö og voru andlit tónleikanna, hafi að undanförnu komið sér í samband við fólk sem slasaðist á tónleikunum.

Þetta staðfestir Arna Johnson, framkvæmdastjóri Tix á Íslandi, en félagið hefur haft milligöngu um að koma þeim þremur í samband við viðkomandi tónleikagesti.

„Þeir voru miður sín yfir þessu. Þeim er annt um sína aðdáendur. Það höfðu einhverjir haft samband við okkur og við útveguðum þeim lista, og létum fólk vita að þeir myndu hafa samband. Þeir vildu bara heyra í fólki, þeirra upplifun og bara aðeins ná utan um hvað gekk á þarna,“ segir Arna.