„Reynt að halda væntingum niðri og ég spyr mig af hverju?“

Ís­lenska lands­liðið mun þurfa að fara í um­spils­ein­vígi til þess að reyna halda sæti sínu í A-deild Þjóða­deildarinnar. Tveggja marka tap gegn Frakk­landi á heima­velli stað­festi þau ör­lög en sigur í þeim leik hefði engu breytt um það.

Nú þegar að innan við mánuður er í fyrsta leik á EM í Sviss gegn Finn­landi hefur ís­lenska lands­liðinu ekki tekist að vinna leik í síðustu tíu leikjum sínum. Það gerðist síðast í kringum alda­mótin. Er það áhyggju­efni?

„Ég veit ekki hvort maður segi áhyggju­efni en það er alltaf bara til­finning að vinna leik, meira að segja til­finning fyrir okkur sem erum uppi í stúku. Við ræddum það, ég og gamlar lands­liðs­konur, að maður er farinn að sakna þess að fagna ekki al­menni­lega á Laugar­dals­velli. Þú ert að fara inn í loka­keppni, og auðvitað skiptir máli og þú er með það bak við eyrað að við verðum að fara vinna leik. Við erum á leiðinni á EM og það er alveg ljóst að við verðum að vinna leik ef við ætlum okkur upp úr þessum riðli.“

„Vil heyra aðeins meiri ákefð“

Miðað við viðtöl eftir leik í gær truflar sigur­lausa hrinan ekki leik­menn en meðvitaðar um stöðuna hljóta þær að vera.

„Mér finnst viðtölin nú svolítið eins­leit, svipuð svör frá öllum, eins og það sé aðeins búið að fara yfir það hvernig eigi hrein­lega að svara ykkur fjölmiðlamönnum. En það er reynt að halda væntingum niðri, ég spyr mig af hverju? Við erum að fara í loka­mót, allur þessi hópur var á þessu móti fyrir þremur árum síðan, við erum með lið á frábærum aldri og erum best stað­setta liðið á heims­lista FIFA í þessum riðli. Mér finnst þetta bara snúast um að ætla. Við ætlum bara upp úr þessum riðli, ég vil heyra aðeins meiri ák­efð.“

Hefði viljað sjá fastari skorður

Enn sé margt á reiki varðandi liðið í að­draganda móts. Helena telur Þor­stein Halldórs­son lands­liðsþjálfara enn reyna að finna ákveðin svör tengd varnar- og sóknar­línu liðsins

„Það væri stundum gaman að geta komist inn í hausinn á þjálfaranum og séð hvað hann er að hugsa. Mér finnst hann svolítið enn vera að ákveða vörnina sína. Við sáum breytingar á milli leikja núna. Guðný kemur núna inn í bak­vörð, Natasha var þar í síðasta leik. Þetta var líka svolítið áberandi í loka­keppninni fyrir þremur árum. Þar spilaði sama vörnin ekki leikina þrjá.“

„Mér finnst hann líka enn vera að ákveða fremstu þrjá og eins miðjuna. Ég veit að það geta vel komið upp meiðsli en það er enginn heimur full­kominn, það kemur alltaf upp. Eins og þetta lítur út er hann enn að reyna átta sig á því hvaða lið hann vill hafa. Við þekkjum söguna. Með ís­lenska karla­lands­liðið stillti Lars Lager­back alltaf upp sama liðinu og ég kannski hefði vilja sjá okkur full­móta það.

Við erum í vand­ræðum með níuna. Senterinn, hver á að vera þar? Þær hafa verið svolítið fljótandi. Margir segja að Sveindís sé meiri kant­maður og að við viljum hafa hana svolítið í boltanum en þá geta hlaupin orðið löng. Mér finnst ég ekki alveg sjá allt sem ég vildi vera búin að sjá núna en ég ætla ekkert að vera svartsýn. Ég veit alveg að Þor­steinn finnur út úr þessu. En ég hefði viljað sjá fastari skorður á þessu.“

Á betri stað en á síðasta EM

Niður­staðan á EM fyrir þremur árum síðar voru þrjú jafn­tefli í þremur leikjum, Helena telur liðið á betri stað komandi inn í næsta mót

„Ég myndi halda að við ættum að vera á betri stað. Liðið er eldra, Sveindís Jane og Karólína Lea voru sem dæmi 21 árs gamlar á því móti. Við erum með þær á frábærum aldri núna og þær komnar með miklu meiri reynslu. Það er miklu meiri reynsla í hópnum heldur en var á þeim tíma. Að því leiti geri ég þá kröfu að við förum upp úr þessum riðli. Það er ekki spurning.“