Ísraels­menn undir­búi á­rás á skútuna með Gretu Thunberg um borð

Sænski aðgerðarsinninn Greta Thunberg sigldi af stað frá hafnarborginni Kataníu á Sikiley til Gasa við tólfta mann. Hópurinn hugðist mótmæla hernámi Ísraels á svæðinu og flytja mat og aðrar nauðsynjavörur til hinnar hungursorfnu Gasastrandar. Með Gretu í för er meðal annars Liam Cunningham sem fór með hlutverk sinjórs Davos Seaworth í Krúnuleikunum og franskur þingmaður Evrópuþingsins.

Hungur sverfur að Gasabúum

Hópurinn hóf för sína frá Sikiley að kvöldi síðasta sunnudags og til stóð að hann næði Botnalöndum á morgun. Mikil hungursneyð sverfur að íbúum Gasastrandarinnar enda hefur Ísraelsher unnið markvisst gegn því að mannúðaraðstoð berist þangað undanfarna mánuði. Ísraelsmenn hyggjast leggja Gasaströndina endanlega undir sig á næstu mánuðum.

Skútan Madleen hefur hægt og bítandi nálgast Palestínu undanfarna daga en hægt er að fylgjast með ferðum hennar í rauntíma með því að smella hér. 

Hins vegar er líklegt að Ísraelsmenn hafi beitt truflunarbúnaði á staðsetningarbúnað aðgerðarsinnanna enda eru þau samkvæmt búnaðinum stödd á alþjóðaflugvellinum í Amman, höfuðborg Jórdaníu, sem er um rúmum hundrað kílómetrum frá ströndum Palestínu og því harla ólíklegt að þeim hafi tekist að sigla þangað.

„Ég hef skipað ísraelska hernum að bregðast við og sjá til þess að Madleen nái ekki til Gasa. Við gyðingahatarann Gretu og félaga hennar, segi ég skýrt: Snúið við því þið munuð ekki ná Gasa,“ er haft eftir Israel Katz varnarmálaráðherra í yfirlýsingu en Times of Israel greinir frá.

„Ísraelsríki mun ekki leyfa neinum að rjúfa herkvína á Gasa. Aðaltilgangur hennar er að hindra vopnagjafir til Hamas, morðóðra hryðjuverkasamtaka sem eru með gísla í haldi og fremur stríðsglæpi,“ segir hann jafnframt.

Ísraelsmenn undirbúi árás

Brasilíski aðgerðarsinninn Thiago Ávila sem er um borð í Madleen birti færslu fyrr í dag þar sem hann segir skútuna vera um 162 sjómílum frá ströndum Gasa.

„Við vitum hvað það þýðir þegar þeir fara að trufla fjarskiptabúnaðinn okkar. Það þýðir að þeir eru að undirbúa sig undir viðbragð eða árás,“ segir hann í myndbandi sem hann birti af þilfari skútunnar í dag.

„Við höfum öll heyrt í ísraelskum miðlum að S13-sveit ísraelsku leyniþjónustunnar sveitarinnar væri á leiðinni. Þeir eru að undirbúa stríðsglæp og við verðum að koma í veg fyrir það,“ segir Thiago.