OKC byrjað að undir­búa sigur­há­tíð sína fyrir leikinn

Oklahoma City Thunder tekur á móti Indiana Pacers í nótt í hreinum úrslitaleik um NBA meistaratitilinn. Staðan í einvíginu er 3-3 og þetta er í fyrsta sinn í níu ár sem við fáum slíkan úrslitaleik í NBA.

Thunder er á heimavelli og vissulega sigurstranglegra liðið. Indiana Pacers hefur þá verið afskrifað ansi oft í þessari úrslitakeppni en hefur alltaf komið sterkt til baka.

Þessi veisla verður sýnd beint á Sýn Sport 2 í kvöld og hefst upphitunin klukkan 23.30 en leikurinn rétt eftir miðnætti.

Það ætti að vera olía á eldinn hjá Pacers liðinu að sjá myndir af skreyttum rútum Oklahoma City Thunder þar sem á stendur NBA meistarar.

Rick Carlisle, þjálfari Indiana Pacers, vissi af þessu og ræddi þetta á blaðamannafundi fyrir oddaleikinn eins og sjá má hér fyrir neðan.

„Ég var að sjá myndband sem fer líklega á flug á netmiðlum. Þar má sjá skreyttar rútur sem á stendur meistarar og á greinilega að nota fyrir sigurhátíð þeirra. Það er þegar búið að mála á þær eins og þeir verði meistarar. Það er það eina sem ég er að hugsa um akkúrat núna,“ sagði Rick Carlisle.

Hann þarf væntanlega ekki að tala mikið við liðið sitt fyrir leikinn. Sýnir leikmönnum þessar myndir af meistararútum OKC.