Bestu mörkin: Völdu drauma­lið Ís­lands á EM og engin þeirra eru eins

Besta deild kvenna í fótbolta er að fara í langt frí vegna Evrópumóts kvenna í Sviss en í uppgjörsþætti Bestu markanna fyrir EM-fríið horfðu Helena Ólafsdóttir, sérfræðingar hennar og sérstakur gestur þáttarins, aðeins til Evrópumótsins.

Þau fjögur veltu fyrir sér mögulegu byrjunarliði íslenska landsliðsins á Evrópumótinu en stelpurnar okkar mæta þar Finnlandi, Sviss og Noregi í riðlakeppninni.

Helena Ólafsdóttir stillti upp sínu draumaliði en það gerðu einnig sérfræðingarnir Katrín Ómarsdóttir og Mist Rúnarsdóttir. Það gerði líka gestur þáttarins, tónlistarmaðurinn Jón Ólafsson. Jón er mikill fótboltaáhugamaður og mikill Þróttari.

Athygli vekur að öll fjögur draumalið þeirra eru ólík og það er því nokkur spenna í loftinu um það hvernig Þorsteinn Halldórsson, landsliðsþjálfari, muni stilla liðinu upp í fyrsta leik.

Sex leikmenn komust þó í byrjunarliðið hjá þeim öllum en það eru þær Cecilía Rán Rúnarsdóttir, Glódís Perla Viggósdóttir, Guðrún Arnardóttir, Dagný Brynjarsdóttir, Karólína Lea Vilhjálmsdóttir og Sveindís Jane Jónsdóttir.

Þær Dagný og Guðrún eru þó ekki í sömu stöðum hjá öllum. Helena Ólafsdóttir og Katrín Ómarsdóttir eru sem dæmi með Dagnýju sem fremstu konu en ekki inn á miðjunni. Guðrún er í bakverði hjá tveimur en í miðverði hjá tveimur.

Tveir leikmenn komust í byrjunarliðið hjá þremur af fjórum en það eru þær Natasha Anasi og Hildur Antonsdóttir.

Alls voru sextán leikmenn í íslenska hópnum í einu eða fleiri af þessum draumaliðum. Hér fyrir ofan má sjá umræðuna um draumaliðin og þau má síðan sjá öll hér fyrir neðan.