Gæti orðið dýrastur í sögu KR

Fótbolti.net hefur heimildir fyrir þessu og segir jafnframt í grein sinni að Alexander gæti orðið dýrasti leikmaður sem danskt félag hefur keypt frá Íslandi. Áður hafði verið fjallað um það í Dr. Football að Alexander væri líklegur til að velja Nordsjælland en að hann væri eftirsóttur af fjölda félaga.

Alexander fór einmitt til reynslu hjá Nordsjælland og einnig FC Kaupmannahöfn í vetur, áður en hann skrifaði undir samning við KR sem gildir út árið 2027.

Ekki liggur fyrir hvenær Alexander færi til Nordsjælland, ef af vistaskiptunum yrði, en hafa má í huga að hann á enn eftir eitt ár í grunnskóla.

Áhugi á þessum efnilega leikmanni ætti ekki að koma á óvart en hann varð í fyrrasumar yngsti leikmaðurinn til að spila í efstu deild karla á Íslandi, þá 14 ára og 147 daga gamall, þegar Óskar Hrafn Þorvaldsson setti hann inn á í 4-2 sigri gegn ÍA. Pabbi hans, Pálmi Rafn Pálmason, hafði áður verið með Alexander á varamannabekknum þegar hann stýrði KR tímabundið.

Alexander hefur síðan orðið yngstur til að vera í byrjunarliði í efstu deild, yngstur til að gefa stoðsendingu og yngstur til að skora, og hrifsað met sem áður voru í eigu Eiðs Smára Guðjohnsen (Sigurður Breki Kárason, einnig í KR, var þó á undan til að bæta met Eiðs sem sá yngsti í byrjunarliði, áður en Alexander bætti met Sigurðar).