Rauð hitaviðvörun hjá stelpunum okkar í Serbíu

Íslenska landsliðið er við æfingar í Stara Pazova, rétt norðan við höfuðborgina Belgrad og spilar þar æfingaleik gegn Serbíu á morgun áður en haldið verður á EM í Sviss.

Veðurstofa Serbíu var með rauða viðvörun í gildi yfir landið allt í dag, frá morgni fram á kvöld, vegna hitans sem hefur hæst mælst fjörutíu stig en var um tveimur gráðum lægri á svæðinu þar sem stelpurnar okkar eru.

Sem er enn hærri hiti en var í gær, þegar appelsínugul viðvörun var við gildi og Karólína Lea stakk sér á bólakaf í kalda pottinn.

Mesta hitabylgjan er þó afstaðin og spáð er lægri hita á morgun, en á móti kemur gul viðvörun sem verður í gildi vegna þrumuveðurs og rigningarskúra. Búast má því við blautum velli þegar Ísland mætir Serbíu í æfingaleiknum, klukkan fimm á morgun.

Og þó hitinn hafi verið hár hafði hann ekki sjáanleg áhrif á stemninguna hjá stelpunum okkar, sem voru hver annarri brosmildari eins og sjá má á meðfylgjandi myndum frá KSÍ.