„Nú hljóta viðvörunarbjöllur að hringja“

Norska kvennalandsliðið tapaði í gær fyrir grönnum sínum frá Svíþjóð með tveimur mörkum gegn engu í síðasta leik liðanna fyrir Evrópumótið sem hefst í Sviss í næstu viku. 

Ritað er um það í norsku miðlunum að um verðskuldað tap Noregs hafi verið að ræða en leikurinn fór fram á Ullevaal leikvanginum í Osló. 

Carl-Erik Torp, sérfræðingur NRK og fyrrum atvinnumaður í fótbolta, hefur áhyggjur af frammistöðu norska liðsins svona stuttu fyrir EM. 

„Ef þetta er það sem að okkur verður boðið upp á þegar kemur að EM þá tel ég að norska liðið muni ekki komast upp úr sínum riðli,“ segir Carl-Erik. „Nú hljóta viðvörunarbjöllurnar að hringja.“

Ekki mátti heyra sömu áhyggjurnar hjá leikmönnum norska landsliðsins, reynsluboltinn Ada Hegerberg segir heilt yfir frammistöðu norska liðsins hafa verið nokkuð góða. Liðið hafi tekið ákveðnar áhættur í leiknum og þurft að þora því að gera mistök.

Noregur mætir heimakonum í Sviss í fyrstu umferð riðlakeppni EM þann 2.júlí næstkomandi en auk þessara liða mynda Ísland og Finnland A-riðil mótsins. Tvö efstu lið riðilsins komast áfram í útsláttarkeppni mótsins að riðlakeppninni lokinni. 

„Þetta vekur upp áhyggjur fyrir mótið,“ heldur Carl-Erik áfram. „Þetta var síðasta prófið fyrir mót en það var tilþrifalítið...við fengum engin góð svör.“