Skýjað og skúrir en ekki of kalt

Þetta kemur fram í veðurspá Veðurstofunnar fyrir daginn í dag. Þar kemur fram að hitinn verði á bilinu sex til fjórtán stig, þar af verði svalast á Norðurlandi. 

„Norðlæg átt á morgun, víða gola eða kaldi og það dregur smám saman úr vætu, og við Faxaflóa ætti að rofa til. Á Suður- og Suðausturlandi verður áttin hins vegar breytileg og þar má búast við nokkuð öflugum skúradembum þegar líður á daginn. Hiti breytist lítið,“ segir svo um veður morgundagsins í hugleiðingum veðurfræðings.

Veðurhorfur á landinu næstu daga

Á mánudag: Norðlæg eða breytileg átt 3-10 m/s. Lítilsháttar væta á norðurhelmingi landsins og hiti 5 til 10 stig, en allvíða skúrir sunnanlands með hita 8 til 14 stig.

Á þriðjudag: Norðvestlæg eða breytileg átt 3-10 og dálítil væta í flestum landshlutum. Hiti breytist lítið.

Á miðvikudag: Sunnan 5-10 og væta með köflum, en stöku skúrir um landið norðaustanvert. Hiti 8 til 14 stig.

Á fimmtudag: Suðvestan og vestan 3-8 og skúrir eða dálítil rigning. Hiti 8 til 16 stig, mildast austanlands.

Á föstudag: Vestlæg eða breytileg átt og dálítil væta á víð og dreif. Heldur hlýnandi.

Á laugardag: Suðlæg átt og fer að rigna, en lengst af þurrt um landið austanvert.