Rúnar Alex brákaði bein á fyrstu æfingunni

Undirbúningstímabilið var að byrja hjá dönsku meisturunum í gær og framundan er æfingaleikur í dag. Þjálfarinn Jacob Neestrup ræddi við blaðamenn á æfingasvæði liðsins í austurrísku ölpunum í morgun og greindi frá því að Rúnar Alex hafi meiðst á fyrstu æfingunni.

„Því miður er Rúnar Alex meiddur… Hann brákaði bein í höndinni, eða framhandleggnum. Ég veit ekki nákvæmlega hvar en hann verður frá næstu fjórar vikurnar eða svo, sem er auðvitað synd, fyrir hann fyrst og fremst“ sagði Neestrup.

„Oscar Buur mun spila allan leikinn gegn Ludogorets í dag og Nathan Trott mun spila á fimmtudaginn gegn Sparta Prag“ sagði Neestrup einnig.

Rúnar Alex fær því ekki tækifæri til að sanna sig á ný. Hann var varamarkmaður FCK lengst af síðasta tímabili en undir lokin var hann orðinn þriðji markmaðurinn og haldið utan hóps. Rúnar missti einnig sæti sitt sem þriðji markmaður íslenska landsliðsins í síðasta glugga, þegar Anton Ari Einarsson var valinn í staðinn.