„Tinna mamma“ heldur áfram utan um stelpurnar sínar á EM

Sindri Sverrisson skrifar 2. júlí 2025 08:03

Tinna Mark Antonsdóttir og Kristianstad-stelpurnar hennar. Hlín Eiríksdóttir flutti reyndar í vetur, til Leicester, en Guðný Árnadóttir, Katla Tryggvadóttir og Alexandra Jóhannsdóttir eru fastagestir á heimili Tinnu. KSÍ

„Hún sér alltaf um mig, sama hvar það er,“ segir Guðný Árnadóttir um eina af fólkinu á bakvið tjöldin sem fylgir íslenska kvennalandsliðinu í fótbolta á EM. „Tinnu mömmu“ sem passar svo vel upp á Kristianstad-hópinn sinn.

Ísland hefur keppni á EM í dag klukkan 16 með leik við Finna í A-riðli. Hvert smáatriði getur skipt sköpum á svona móti og þó að stærri þjóðir séu með stærra teymi, þá er Ísland með mjög öflugan hóp fólks sem starfar í kringum stelpurnar okkar.

Einn af þremur sjúkraþjálfurum landsliðsins á EM er Tinna Mark Antonsdóttir sem margar í hópnum þekkja afar vel frá Kristianstad í Svíþjóð. Þangað flutti Tinna fyrst þegar maðurinn hennar, Ólafur Guðmundsson landsliðsmaður í handbolta, fékk samning þar fyrir um þrettán árum.

Heimili þeirra hefur síðan, fyrir utan nokkur ár í öðrum löndum, verið opið fyrir íslenskar landsliðskonur. Guðný, Alexandra Jóhannsdóttir og Katla Tryggvadóttir nóta góðs af því sem leikmenn Kristianstad í dag, og Hlín Eiríksdóttir var þar þangað til Leicester keypti hana í byrjun árs.

„Búum eiginlega heima hjá henni“

Guðný segir Tinnu sjá alveg sérstaklega um stelpurnar:

„Það er þannig. Hún er „Tinna mamma“ og sér alveg um okkur. Við búum eiginlega heima hjá henni. Við erum bara alltaf þar. Svo er hún að hugsa um okkur þegar við erum meiddar. Við erum hjá henni í mat og bara allt. Heimilið hennar er eiginlega heimilið okkar,“ sagði Guðný við Vísi fyrir utan hótel landsliðsins í Sviss.

Og hún er hæstánægð með að hafa núna Tinnu í landsliðinu einnig:

„Það er mjög gott fyrir okkur. Við erum nokkrar dætur hennar hérna þannig að það er mjög gott.“

Klippa: „Búum eiginlega heima hjá henni“

„Ætlum okkur að gera þetta saman hér“

Guðný gerir sterkt tilkall til sætis í byrjunarliði Íslands í dag en viðurkennir að samkeppnin sé hörð í bakvarðastöðunum:

„Ég er búin að vera að glíma við smávægileg meiðsli fram að móti, þannig að ég er að vona að ég verði orðin góð. Mér líður ótrúlega vel hér, vellirnir eru geggjaðir þannig að mér líður bara vel í líkamanum akkúrat núna. Ég er bara glöð að vera komin á þann stað núna að líða vel og vona auðvitað alltaf að ég fái að spila, en það er mikil samkeppni í hópnum og við ætlum okkur að gera þetta saman hér,“ sagði Guðný eins og sjá má í spilaranum hér að ofan.

Landslið kvenna í fótbolta EM 2025 í Sviss

Tengdar fréttir

„Engar svakalegar reglur hér“

Leikmenn íslenska landsliðsins í fótbolta hafa rætt um það sín á milli hvernig best sé að nálgast samfélagsmiðla og fjölmiðla á meðan á EM stendur. Guðný Árnadóttir segir hvern og einn leikmann finna hvað henti sér best og að engar sérstakar reglur gildi innan hópsins um þessi mál né önnur.

1. júlí 2025 22:32

Klár í erfiðan slag við Ísland: „Þær eru fljótar en við erum með svipað lið“

Miðvörðurinn frábæri Natalia Kuikka verður að vanda í lykilhlutverki hjá finnska landsliðinu á EM. Hún er klár í erfiðan leik gegn Íslendingum á morgun og segir allt geta gerst í A-riðlinum.

1. júlí 2025 17:32

Fjöldi Íslendinga á EM og Tólfan slær taktinn

Stelpurnar okkar verða dyggilega studdar á Evrópumótinu í fótbolta sem nú fer að hefjast í Sviss. Fæstir stuðningsmenn verða á fyrsta leik, við Finna á morgun, en þó má búast við á annað þúsund Íslendingum. Tólfan verður að sjálfsögðu á sínum stað.

1. júlí 2025 14:02

Glódís alveg búin að kveðja meiðslin og allar klárar í slag við Finna

Engin meiðsli eða veikindi eru í íslenska landsliðshópnum fyrir fyrsta leik á EM í fótbolta, gegn Finnlandi á morgun í Sviss.

1. júlí 2025 16:09

Orðnar vanar hitanum án loftkælingar en fannst rigningin góð

Skipst hefur á sólskini og skúrum í Sviss, þangað sem íslenska kvennalandsliðið er mætt til leiks á Evrópumótið. Stelpurnar okkar leyfa háum hita ekki að hafa áhrif en tóku rigningu gærdagsins fagnandi þar sem það er engin loftkæling á hóteli liðsins.

1. júlí 2025 12:02