Dramatík í endurkomusigri Norð­manna í hinum leik ís­lenska riðilsins

Norðmenn komust upp fyrir Finna á fleiri mörkum skoruðum en Finnar unnu 1-0 sigur á Íslandi fyrr í kvöld.

Heimakonur í Sviss komust þó yfir á 28. mínútu með marki Nadine Riesen og þær voru 1-0 yfir í hálfleik.

Þær norsku byrjuðu seinni hálfleikinn hins vegar af miklum krafti og skoruðu tvö mörk með fjögurra mínútna millibili snemma í honum.

Það fyrra skoraði Ada Hegerberg á 54. mínútu með skalla eftir hornspyrnu Vilde Böe Risa en það seinna var klaufalegt sjálfsmark hjá hinni svissnesku Juliu Stierli.

Hegerberg fékk tækifæri til að koma Noregi tveimur mörkum yfir á 70. mínútu en skaut þá framhjá úr vítaspyrnu.

Aðeins nokkrum sekúndum síðar þá fengu Svisslendingar ódýra vítaspyrnu. Þar kom Varsjáin dómaranum til bjargar með því að finna rangstöðu í aðdragandanum. Ekkert varð því af þeirri vítaspyrnu.

Svisslendingar reyndu að sækja jöfnunarmark en tókst ekki. Tvö stigalaus lið, Ísland og Sviss, mætast því í næsta leik.