Allt sem við vitum um bana­slys Diogo Jota

Bílslysið varð í kringum hálffeitt að staðartíma eða um hálf ellefu að íslenskum tíma í gærkvöldi. Bræðurnir óku saman Lamborghini bíl og voru að taka fram úr öðrum bíl þegar dekk sprakk á bílnum. Þeir misstu stjórn á bílnum og hann fór út af veginum. Það kviknaði strax í bílnum og hann brann á augabragði.

Jota var nýbúinn að gangast undir lítils háttar skurðaðgerð og læknir hans mældi með því að hann myndi ekki fljúga til Englands. Jota þurfti samt sem áður að komast aftur til Liverpool áður en undirbúningstímabilið færi af stað.

Þeir bræður ákváðu því að keyra þangað sem Jota gæti tekið ferjuna til Englands. Liverpool byrjar æfingar á mánudaginn kemur og fyrsti undirbúningsleikurinn er fyrirhugaður gegn Preston North End sunnudaginn 13. júlí.

Stuðningsmenn Liverpool hafa safnast saman fyrir utan Anfield til að minnast portúgalska framherjans. Þar mátti líka sjá stuðningsmann nágrannaliðsins og erkifjendanna í Everton mæta með blóm.

Sumir hafa beðið Liverpool um að leggja númerinu tuttugu til minningar um Jota þannig að hann verði sá síðasti til að klæðast treyju með því númeri fyrir þá rauðklæddu.

Jürgen Klopp, fyrrverandi knattspyrnustjóri Liverpool og sá sem keypti Jota frá Úlfunum, er einn af þeim sem hafa skrifað hjartnæm minningarorð um leikmanninn. Cristiano Ronaldo er annar. Fjölmargir samherjar, mótherjar, félög og knattspyrnusambönd hafa minnst hans.

Liverpool hefur einnig stofnað minningarbók um Jota. Það er bæði hægt að minnast Jota með því að skrifa í bókina á Anfield en eins verður stafræn minningarbók stofnuð á netinu fyrir þau sem komast ekki á staðinn.

Mínútuþögn verður fyrir leiki dagsins á Evrópumóti kvenna til minningar um bræðurna.

Jota giftist æskuást sinni fyrir aðeins tveimur vikum en þau eiga þrjú lítil börn saman. Hann lyfti bæði bikar í síðasta leik sínum með Liverpool (enski meistaratitilinn) og í síðasta leik sínum með portúgalska landsliðinu (Þjóðadeild UEFA).