Tími Söndru eftir barns­burð og meiðsli: „Trúi og vona að þetta verði mitt mót“

Sandra gat ekki spilað á EM fyrir þremur árum því þá var hún nýbúin að eignast barn og þó að hún hafi verið með á EM 2017 þá hafði hún slitið krossband í hné sama ár. Þrítug að aldri er hún núna mætt til Sviss í stóru hlutverki. Fjallað var um þetta í Sportpakkanum á Sýn í gærkvöld, eins og sjá má hér að neðan.

„Það er mjög margt búið að gerast síðan árið 2017, þegar ég fór síðast á stórmót. Búin að eignast eina stelpu og ganga í gegnum erfið meiðsli, mikið af hólum og hæðum. Búin að fara út í atvinnumennsku og koma aftur heim. Það er ýmislegt sem er komið núna í reynslubankann sem mun nýtast manni vel núna. Þekkingin frá því að hafa verið á stórmóti hjálpar manni líka klárlega til að róa taugarnar og komast í gegnum svona stórmót, og njóta þess meira en maður kannski gerði á sínu fyrsta móti,“ sagði Sandra við hótel landsliðsins í gær, við Thun-vatnið.

Þessi mikli markahrókur hóf leik gegn Finnum á miðvikudag í fremstu víglínu Íslands. Þetta stórmót er því alls ólíkt EM 2017 þegar Sandra var nýskriðin upp úr meiðslum:

„Það var svona aðeins öðruvísi hlutverk sem að maður var í þá. Maður var fyrst og fremst þakklátur fyrir að hafa náð sér af meiðslunum, komið sér á stórmót og rosalega mikil forréttindi að hafa fengið að spila, komið inná í einum leik. En núna er maður meira í sínu toppstandi, búinn að leggja mikið á sig til að komast hingað og vera að toppa. Það er rosalega gaman að vera hérna og hafa strax í fyrsta leik fengið stórt hlutverk. Ég er rosalega spennt og trúi og vona að þetta verði mitt mót,“ sagði Sandra.

Fengu frídag: „Örugglega mjög gott fyrir alla“

Sandra og aðrir leikmenn íslenska liðsins fengu frídag daginn eftir tapið gegn Finnum, þar sem þær gátu fengið að verja tíma með fjölskyldu eftir stífa törn að undanförnu. Það var kærkomið, fyrir átökin sem brátt taka við með leikjum við Sviss á morgun og við Noreg á fimmtudaginn.

„Við vorum hér [við hótelið] í smátíma og fórum svo bara niður í bæ, í Thun, og fengum okkur kvöldmat. Nýttum daginn vel og kvöldið,“ sagði Sveindís Jane Jónsdóttir.

„Þetta var mjög næs og kærkomið frí og ég held að allir hafi nýtt þetta vel. Þetta var örugglega mjög gott fyrir alla, líka þau í staffinu. Aðeins að koma okkur út. Þetta er frábært svæði hér en það er líka gott að koma sér út fyrir svæðið og njóta,“ bætti Sveindís við.

Katla Tryggvadóttir tók í sama streng: „Ég hitti fjölskylduna mína, sem var mjög gott. Sérstaklega þegar maður býr í útlöndum og hittir þau ekkert alltaf, þannig að það var mjög gott að geta hitt þau.“

„Foreldrar mínir komu hérna á hótelið og svo fórum við eitthvað í bæinn. Þetta var bara mjög góður dagur,“ sagði Agla María Albertsdóttir og Sandra María var sammála því:

„Við hittum forsetann og fengum mjög góða ræðu frá henni, hvetjandi orð sem að við tökum með í næstu verkefni. Síðan tókum við góða æfingu og fórum aðeins yfir málin, og áttum svo góðan fjölskyldudag með okkar nánustu sem nærði vel sálina og gerði rosa gott fyrir næstu daga.

Fjölskyldurnar voru velkomnar að koma frá klukkan tvö, kaffi og léttar veitingar í boði. Fólkið okkar var hérna og það var verið að spila létta leiki og kynnast. Pínu að fagna og hafa gaman saman sem ég held að gefi okkur aukaorku í verkefnin sem eru fram undan,“ sagði Sandra María.