Menning

Risa­stór menningar­há­tíð á Flat­eyri

Dóra Júlía Agnarsdóttir skrifar
Ragnheiður Gestsdóttir opnar nýtt verk á Flateyri.
Ragnheiður Gestsdóttir opnar nýtt verk á Flateyri. Aðsend

Listalífið á Flateyri iðar sem aldrei fyrr en næstkomandi laugardag hefst þar menningarhátíðin ListaVestrið. Fjöldi íslenskra kanóna koma að hátíðinni og má þar nefna Gabríelu Friðriksdóttur og Hrafnkel Sigurðsson.

Í fréttatilkynningu segir:

„Menningarhátíðin ListaVestrið opnar á Flateyri laugardaginn 12. júlí klukkan 16:00. Í galleríinu Undir brúnni, sem er staðsett undir aflagðri brú á Sólbakka rétt utan Flateyrar, opnar myndlistarkonan Ragnheiður Gestsdóttir nýtt verk.

Þá verður frumflutningur á nýju tónverki eftir Eirík Stephensen og Rún Árnadóttur þegar opnuð verður hljóðinnsetningin Jökull í Tankinum á Sólbakka. Sá viðburður er styrktur af Uppbyggingarsjóði Vestfjarða. Í gömlu Slökkvistöðinni á Brimnesvegi opnar svo myndlistarkonan Gabríela Friðriksdóttir innsetninguna Ströndinni.“

Eiríkur Stephensen og Rún Árnadóttir frumflytja tónverk.Aðsend

Undanfarin ár hafa Galleríið Undir Brúnni, Tankurinn og Gamla Slökkvistöðin staðið fyrir árlegum menningarviðburðum sem laðað hafa til sín fjölda fólks og vakið verðskuldaða athygli. 

„Þetta árið hefur verið ákveðið að sameina viðburði sumarsins undir einn hatt undir nafninu ListaVestrið. Markmið hátíðarinnar er að bjóða upp á metnaðarfulla menningarviðburði, fá okkar fremstu listamenn til að taka þátt og efla menningarlíf á Vestfjörðum.“

Gabríela Friðriks er meðal listamanna sem tekur þátt í ListaVestrinu.Aðsend

Fleiri listamenn taka þátt í ListaVestrinu í svokölluðu „off venue“ í ár og má þar nefna Jean Larson í Krummakoti Ránargötu 10, Hrafnkell Sigurðsson, sem var valinn myndlistarmaður ársins 2023, í Tankinum, Helga Guðrún á Bryggjukaffi og Bjarni Massi á Vagninum. 

Fjörið heldur áfram fram eftir nóttu því á Vagninum verður einnig haldið Ógleymaball um kvöldið.

Sýningarnar eru opnar daglega á milli klukkan tólf og sex frá tólfta til tuttugasta júlí en gallerýið Undir brúnni er opið allan sólarhringinn næsta árið.






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.