Dag­ný: Veit ekkert hvað ég er að fara að gera

Sindri Sverrisson náði á Dagnýju skömmu eftir leik og byrjaði á að spyrja út í hvernig það hafi verið að spila leikinn gegn Noregi.

„Við byrjuðum sterkt en héldum ekki nógu lengi út og Noregur var með öll völd á vellinum mestmegnis af leiknum. Við sýndum karakter í lok leiksins og náðum að skora nokkur mörk og þjarma að þeim. Leikurinn hefði þurft að vera aðeins lengri því það hefði verið ansi sætt að stela stigi þarna í lokin en við vorum bara ekki nógu góðar í dag.“

Það er hægt að tala um gæði Noregs en þær stilltu upp hálfgerðu varaliði en það er nóg til af leikmönnum þar en Ísland átti í erfiðleikum með að klukkar þær.

„Við lentum svolítið eftir á og fengu að gera nánast það sem þær vildu með boltann og voru 1-2 skrefum á undan. Eins og ég segi þá er hópurinn þeirra ótrúlega sterkur. Við eigum samt ekki að lenda 4-1 undir á móti þeim en við þurfum að spila betur á móti þeim.“

Dagný var beðin um að gera upp mótið sem hlýtur að teljast vonbrigði.

„Mér fannst við spila illa í of margar mínútur. Við spiluðum illa í 60 mínútur á móti Finnum, spiluðum vel á móti Sviss. Það hefði getað dottið hvoru megin. Í fótbolta þarf stundum heppni en færin féllu með þeim. Í dag spilaði Noregur betur en við of stóran hluta af leiknum. Þegar komið er inn á stórmót þá þarftu að spila vel til að fá eitthvað út úr leikjunum og við hefðum þurft að spila betur í fleiri mínútur í mótinu.

Dagný er mjög reynslumikill leikmaður og var hún því spurð hvort það hafi verið eitthvað sem hægt hafi verið að gera betur.

„Ég er búinn að spila í minna hlutverki en mig langaði og erfitt að segja hvað hafi verið hægt að gera betur. Ég reyndi að nýta mínar mínútur eins vel og ég gat en erfitt að segja hvað hafi betur mátt fara.“

Það þurfti að fara yfir framtíðarhorfurnar og Dagný, sem er elst í hópnum, var spurð að því hvort hún vildi halda áfram í landsliðinu og hvernig framhaldið hjá Dagnýju væri persónulega.

„Já, á meðan ég er að spila þá vil ég halda áfram í landsliðinu og svo er það bara undir landsliðsþjálfaranum komið hvort hann vilji mig í liðinu eða ekki. Mér finnst ég spræk ennþá.“

„Ef ég á að vera alveg hreinskilin þá veit ég ekki hvað tekur við. Þetta hefur aldrei komið fyrir áður þar sem ég er mjög skipulögð manneskja og þarf að vita hvað er að fara að gerast. Ég hef ekki tekið mér meira en tveggja daga frí síðan ég fæddi son minn í febrúar í fyrra þannig að ég þarf að koma heim núna og hitta strákana mína og taka viku mömmufrí. Ekki gera neitt og ekki hugsa um fótbolta. Svo þarf ég að setjast niður með fjölskyldunni og hugsa hver næstu skref verða. Þetta er auðveldara þegar maður er bara að hugsa um sjálfan sig en eldri sonur minn er á grunnskóla aldri og hinn kominn á leikskóla. Svo þarf ég aðeins að hugsa um manninn minn líka. Við þurfum bara að setjast niður og ákveða hvað næsta skref verður.

Er líklegt að Dagný spili á Íslandi?

„Alveg eins líklegt og að spila úti. Ég veit ekkert hvað ég á að gera og þetta er svar beint frá hjartanu.“