Svein­dís: Maður vinnur ekki leiki nema að skora mörk

Sveindís var spurð hvort það hafi ekki verið skrýtið að spila leikinn gegn Noregi.

„Já vissum fyrir leikinn að þetta væri búið hjá okkur og að þetta væri síðasti leikurinn á EM. Við vildum hinsvegar gera okkar besta og sýna okkar rétta andlit og reyna að vinna leikinn en það gekk ekki. Við allavega skorum mörk en þetta var ekki nógu gott.“

Sveindís skoraði mark og lagði upp annað eins og áður segir og vildi augljóslega kveðja mótið með hvelli. Hún var beðin um að leggja mat á frammistöðu sína á þessu móti.

„Ég meina maður getur alltaf gert betur og ég held að liðið í heild sé ekkert rosalega sátt með frammistöðuna okkar. Persónulega þá vill maður alltaf gera betur, skora fyrir liðið en stundum gengur það bara ekki upp. Ég mæti bara í næsta leik til að gera enn betur. Það er enginn leikmaður í liðinu sem mætir í leik með það hugarfar að gera ekki vel. Ég reyndi að sýna mínar betri hliðar í dag og fannst ég gera ágætlega.“

Eitt sem tekið hefur verið eftir er að Sveindís hlýtur ekki alltaf náð hjá dómurum þó að hún sé tuskuð til inn á vellinum. Finnst henni halla á sig í dómgæslunni?

„Ég veit það ekki. Það hefur ekki mikið fallið með okkur í dómgæslunni í mótinu. Ekki bara gegn mér. Ég veit ekki hvort ég eigi að fá aukaspyrnur eða ekki. Ef maður er á leiðinni niður þá reynir maður að fá eitthvað fyrir það.“

Hafa síðustu dagar verið erfiðir vitandi að liðið er dottið úr keppni?

„Við höfum reynt að vera jákvæðar. Auðvitað. Eftir fyrsta leikinn var allt opið ennþá, leikurinn á móti Sviss var ekki nógu góður og við bara komum ekki nógu góðar til leiks. Ekki gaman auðvitað en við reynum alltaf að sjá það jákvæða og við vitum að veit eigum að geta gert betur. Við komum inn í þetta mót með það í huga að komast upp úr honum, þetta var erfiður riðill, öll liðin vildu komast upp úr riðlinum. Þetta er búið að vera erfitt en við reynum að vera jákvæðar.“

Þegar Sveindís gerir upp mótið eru einhver stór vandamál sem liðið þarf að laga?

„Við skorum engin mörk í fyrstu tveimur leikjunum og maður vinnur ekki leiki nema að skora mörk. Bara það, að skora ekki, er það sem við sjáum eftir. Við fáum ekki mikið af færum þannig að við erum ekki að búa til mikið og það er eitthvað sem við þurfum að gera betur og skoða. Við erum svekktar með okkar frammistöðu fyrir framan markið.“

Það er stutt í næsta verkefni en fyrst þarf liðið að halda sér í A riðli í Þjóðardeildinni en það þarf að fara í umspil til þess. Sveindís talaði einnig um að markmiðið væri að fara á HM í fyrsta sinn og það væru spennandi tímar framundan en fyrst fengi Sveindís fimm daga frí áður en hún færi til Bandaríkjann til að spila fyrir Angels City FC í Los Angeles.