Opnar sig um storma­samt hjóna­band á nýju plötunni

Bandaríski slúðurmiðillinn Page Six tók saman nokkrar línur af plötunni, sem telur 21 lag, þar sem Bieber virðist opna sig um erfiðleika í hjónabandinu. 

Í laginu Walking Away syngur Bieber til að mynda um ástkonu sem kastar grjóti aftan á bak hans, meðan hann er varnarlaus. 

„Við ættum að hætta þessu áður en við segjum eitthvað ljótt“, „þolinmæðin er á þrotum“, „við ættum að taka okkur pásu og falla ekki í ónáð,“ eru allt línur sem Bieber syngur á plötunni. 

Í laginu Daisies syngur listamaðurinn einnig um að kasta krónublöðum af blómi og spyrja „Elskarðu mig eða ekki?“

„Þú sagðir að eilífu en meintirðu það eða ekki?“ syngur hann í laginu.

Þá hyllir hann eiginkonu sína í öðru lagi að nafni Go Baby, kallar hana goðsagnakennda og syngur um „iphone hulstur með varasalva,“ og vísar þar með í Rhodes, snyrtivörumerki eiginkonunnar sem seldi vörur fyrir 212 milljón Bandaríkjadali í fyrra, tæplega 26 milljarða króna. 

Hjónin hófu að stinga saman nefjum árið 2015 en gengu í það heilaga þremur árum síðar. Þau endurnýjuðu heitin í fyrra, áður en þau eignuðust einkasoninn Jack. 

Hailey var harðorð í forsíðuviðtali á tískumiðlinum Vogue í maí síðastliðnum, þegar orðrómar um skilnað ómuðu sem hæst um netheima. 

„Maður hefði haldið að eftir barneignir myndi fólk aðeins slaka á í orðrómunum, en nei,“ sagði Bieber í viðtalinu. „Ætli þessar tíkur verði þá ekki reiðar.“