Ása Ninna kveður Bylgjuna

Ása Ninna greinir frá þessu í færslu á samfélagsmiðlum.

„Síðustu þrjú ár hef ég vaknað rúmlega sex á laugardagsmorgnum og keyrt yfir heiðina með bensínstöðvarkaffi og stírur í augunum. Spennt að standa vaktina með kærum vinum mínum og samstarfsfélögum í Bakaríinu, Svavari Erni og Ásgeiri,“ skrifar Ása.

Hún segir það hafa verið forréttindi að starfa við það sem hún elski, og að í fjölmiðlum hafi hún fundið sína réttu hillu.

„En nú er komið að leiðarlokum í bili á þessari bylgjulengd. Það er ekki léttvæg ákvörðun að hætta í starfi sem þér þykir einstaklega vænt um og kveð ég því Bylgjuna með miklum hlýhug og þakklæti.

Ég veit að ég mun sakna samstarfsfélaga minna ógurlega og sérstaklega þess að vakna með hlustendum Bylgjunnar á laugardagsmorgnum. Það er skrýtin tilfinning að þykja vænt um hóp fólks sem þú sérð kannski ekki beint, en finnur svo sterkt fyrir,“ skrifar Ása og þakkar hlustendum Bylgjunnar kærlega fyrir sig. 

„Umfram allt langar mig að þakka elsku besta Svavari mínum og Ásgeiri - Dýrka ykkur. Ég mun þó standa Bakarísvaktina á morgun hress og kát og mögulega með örlítinn kökk í hálsi. Ég tek fagnandi og spennt á móti nýjum tímum, tækifærum og ævintýrum. Sjáumst einhvers staðar einhvern tíma aftur... á öldum ljósvakans,“ skrifar Ása Ninna.