Sumardeildin hófst á stór­sigri

Þetta er í annað sinn sem sumardeildin er haldin, en í ár taka Manchester United og West Ham þátt ásamt Everton og Bournemouth.

Eftir markalausan fyrri hálfleik komust Bournemouth-menn heldur betur í gang og gengu frá bláklædda liðinu frá Liverpool í seinni hálfleik.

Varamaðurinn Philip Billing kom Bournemouth yfir með þrumuskoti fyrir utan teig á 55. mínútu áður en Dango Outtara tvöfaldaði forystu liðsins fjórum mínútum síðar.

Það var svo annar varamaður, Daniel Adu-Adjei, sem bætti þriðja marki Borunemouth við á 59. mínútu eftir að hafa nýtt sér mistök í varnarlínu Everton.

Ekki urðu mörkin fleiri og niðurstaðan varð því 3-0 sigur Bournemouth. Sumardeildin heldur svo áfram í kvöld og fram á nótt þegar Manchester United og West Ham eigast við.