Myndaveisla: Bylgjulestin lokaði sumrinu í Vaglaskógi

Bylgjulestin 28. júlí 2025 10:53

Kristín Ruth og Svali fengu marga góða gesti í Bylgjubílinn, meðal annars Jökul forsprakka Kaleo og Doctor Victor. Viktor Freyr

Sumarferðalagi Bylgjulestarinnar um landið lauk um liðna helgi í Vaglaskógi á sannkallaðri tónlistarhátíð hljómsveitarinnar Kaleo og fleiri listamanna, Vor í Vaglaskógi.

„Það var ótrúleg upplifun að vera í Vaglaskógi á þessum rosalegu tónleikum. Andrúmsloftið á laugardeginum var algjörlega magnað, það sást langar leiðir á tónleikagestum hvað allir voru ánægðir með þennan viðburð,“ segir dagskrárgerðarmaðurinn Svali en hann og Kristín Ruth stýrðu Bylgjulestinni um helgina.

Um sjö þúsund manns sóttu tónleikana í blíðskaparveðri og var stemmningin einstök en hljómsveitin Kaleo hefur ekki komið fram hér á landi síðan 2015.

„Það var gaman að sjá hvað það var mikið um að fólk væri með hatta, að hætti Jökuls og Kaleo manna, ríkti hálfgerð kúreka stemmning. Hvort þetta verður endurtekið veit ég ekki, en allir sem komu að þessu eiga hrós skilið," segir Svali.

Samstarfsaðilar glöddu gesti

Samstarfsaðilar Bylgjulestarinnar hafa fylgt lestinni um allt land í sumar og létu sig ekki vanta í Vaglaskóg. Sjóvá og Samgöngustofa fjölluðu um umferðaröryggi, Topptjöld og vagnar voru með með iKamper vagn til sýnis, 7up Zero gaf gestum frískandi drykki, bílaumboðið Askja hélt bílasýningu og gjafapokarnir frá Bylgjunni voru að sjálfsögðu á sínum stað með 7up Zero pink, nammi frá Danól og varning frá Bylgjunni.