Opnun Samverks á Hellu fagnað

Samverk er í um átta þúsund fermetra húsnæði á Hellu en fyrirtækið var stofnað á staðnum fyrir 56 árum, eða 1969. Fyrirtækið var komið inn í Kambar byggingarvörur en það fyrirtæki fór í gjaldþrot í vor og var verksmiðjunni á Hellu lokað í kjölfarið, eða 1. apríl. Svo gerðist það í byrjun júlí að Finnbogi Geirsson, forstjóri og stofnandi Stjörnublikks í Kópavogi keypti Samverk úr Þrotabúi Kamba.

Vélar verksmiðjunnar hafa því verið stopp í nokkra mánuði en nú fara hlutirnir að gerast. Samverks skiltið er aftur komið á húsnæðið við Eyjasand 2 og það styttist óðum að starfsfólk mæti til vinnu.

„Þetta eru miklar gleðifréttir og bara mörgum Hellubúum og Sunnlendingum öllum hlýnaði þegar Samverksskiltið kom upp aftur hérna á húsið. Fyrirtækið hefur mikla þýðingu fyrir samfélagið því í ekki stærra samfélagi, sem við búum í þá skipta auðvitað öll störf máli,“ Eiríkur Vilhelm Sigurðarson, verksmiðjustjóri Samverks á Hellu.

Eiríkur Vilhelm segir mjög einmanalegt að ganga um verksmiðjuhús glerverksmiðjunnar þegar engar vélar eru í gangi og engir starfsmenn að vinna en nú sé það allt að fara að breytast.

Og eruð þið að undirbúa núna opnunina og gera allt klárt?

„Já, nú erum við að undirbúa það, undirbúa vélar og búin að vera frá því að þessi kaup áttu sér stað í byrjun júlí. Við erum líka búin að vera að undirbúa birgðahald og annað. Þannig að þetta lítur bara allt vel út og við hlökkum til að geta farið af stað aftur þriðjudaginn 5. ágúst“, segir Eiríkur kampakátur.