Brynjólfur tryggði dramatískan sigur

Brynjólfur jafnaði metin fyrir Groningen með marki á 29. mínútu eftir undirbúning frá Stije Resink, en Daninn Jakob Trenskow hafði komið gestunum í Heerenveen yfir tæpum stundarfjórðungi áður.

Þrátt fyrir nokkur ákjósanleg færi á báða bóga það sem eftir lifði leiks virtist hvorugu liðinu ætla að takast að finna netmöskvana á ný.

Það er alveg þar til á fjórðu mínútu uppbótartíma þegar Brynjólfur var aftur á ferðinni og tryggði Groningen dramatískan 2-1 sigur.

Þetta var fyrsti sigur Brynjólfs og félaga á tímabilinu, en liðið mátti þola 4-1 tap gegn AZ Alkmaar í fyrstu umferð deildarinnar. Heerenveen hefur hins vegar gert eitt jafntefli og nú tapað einum leik í upphafi tímabils.