Kalla tugi þúsunda til her­þjónustu

Samkvæmt fjölmiðlum ytra er búist við því að formaður herforingjaráðs muni gefa áætluninni blessun sína á næstu dögum og mun herinn þá byrja að kalla inn um sextíu þúsund menn og framlengja þjónustu tuttugu þúsund manna úr varaliðinu til viðbótar.

AP fréttaveitan segir að herkvaðning svo margra manna í tæplega tíu milljón manna þjóð hafi án efa umfangsmiklar efnahagslegar og pólitískar afleiðingar, einungis nokkrum dögum eftir að hundruð þúsund Ísraela mótmæltu á götum landsins og kölluðu eftir vopnahléi á Gasaströndinni.

Leiðtogar Gasa samþykktu í gær tillögur að sextíu daga vopnahléi í skiptum fyrir það að þeir slepptu tíu gíslum úr haldi. Sú tillaga var runnin undan rifjum sáttasemjara frá Egyptalandi og Katar en ríkisstjórn Ísrael svaraði því óformlega með kröfu um að öllum fimmtíu gíslunum yrði sleppt. Talið er að einungis tuttugu þeirra séu enn á lífi.

Ísraelar hafa ekki enn svarað formlega en Times of Israel segir tillöguna enn til skoðunar.

Hermennirnir eru sagðir eiga að vera sendir til hverfa borgarinnar þar sem Ísraelar telja Hamas-liða enn virka. Sérstök áhersla verður lögð á göng samtakanna í borginni, sem talin eru umfangsmikil. Ekki liggur fyrir hvenær þessar aðgerðir eiga að hefjast en það gæti gerst á næstu dögum.

Hundruð þúsunda manna hafa leitað sér skjóls í Gasaborg frá því árásir Ísraela á Gasaströndina hófust fyrir um 22 mánuðum.

Þjóðarleiðtogar víða um heim, þar á meðal bandamenn Ísrael, sem og forsvarsmenn mannréttindasamtaka, hafa fordæmt áætlanirnar og varað við því að áframhaldandi árásir á Gasaströndina og hernám Gasaborgar muni auka enn frekar á þjáningar íbúa þar, sem séu þegar flestir á vergangi og standa frammi fyrir hungursneyð.

Talið er að fleiri en 62 þúsund manns hafi fallið í árásum Ísraela frá því þær hófust. Einnig er talið að rúmlega 90 prósent heimila hafi eyðilagst eða orðið fyrir skemmdum. Heilbrigðiskerfi Gasa er hrunið og má segja það sama um vatnsveitur.

Réðust á varðstöð hersins

Talsmenn ísraelska hersins sögðu í morgun að að minnsta kosti átján vopnaðir menn hafi komið úr göngum í Khan Younis í suðurhluta Gasastrandarinnar í morgun og ráðist á varðstöð Ísraela. Talið er að mennirnir hafi ætlað sér að fanga ísraelska hermenn en þeir eru sagðir hafa verið með börur með sér.

Einhverjir vígamannanna eru sagðir hafa komist inn i varðstöðina og skiptust þeir á skotum við ísraelska hermenn.

Þrír hermenn munu hafa særst og herinn segir að minnsta kosti tíu vígamenn hafi verið skotnir eða felldir í loftárás. Átta flúðu aftur ofan í göngin.

Talsmenn Qassam-sveitanna, sem er hernaðararmur Hamas, segja að þó nokkrir hermenn hafi verið felldir í árásinni og að leyniskytta hafi skotið hátt settan ísraelskan hermann.

Herinn birti í dag myndband sem sagt er sýna árásir á vígamennina í Khan Younis.